Chin State chhim lam, Paletwa khawpuia raltlan camp-a an awmna hmun chhia te thawm that leh nan chakkhai a thlen nual thu hriat a ni a.
Paletwa khawpuia raltlante camp-a awmna te hi mau-rap maia sak vek a ni a, tunah hian a chhe deuh vek tawh a, Fur ruah tui a tlak hmaa siam that nan tiin UNHCR leh IRC-ten mau, ban, in chung khuhna leh pawimawh chi hrang hrang te an tanpui thu Paletwa khuaa raltlan tanpuitu zinga mi pakhat chuan heti hian a sawi a.
“Heng Thlamte hi kum 2 vel an lo chen tawhna a nih avangin in chung khuhna leh bang bakah ban te, a mawih tawh a, thli a thleh deuh hian a chhe nghal mai thin a. Thawm that leh turin ban leh mau ringawt pawh sing kaw chuang vel a tul dawn a. Tun hnai lawk atang khan chakkhai a rawn thleng nual a,” tiin a sawi a.
Tun dinhmunah hian Paletwa khawchhungah raltlan camp hmun 5 a awm a, kum 2018 vel khan Arakan Army (AA) te leh Military council sipaite inkahna avangin Paletwa khuaah raltlan an tam phah sawt a.
Raltlan camp hmun 5-ah hian raltlan chhungkua 579 an awm a, khawvela chhawmdawltu pawl (WFP)-ten Buhfai, tel (Chhitui), Chi, Be (Pe) leh taksa chakna tur, ei in chi hrang hrang thla tin an pek thin thu Paletwa khuaa raltlan tanpuitu zinga mi pakhat chuan a sawi a.
AA leh Military council sipaite inbeihna avanga raltlante chu Military council sipaiten an chenna hmunah an hawtir leh thu hriat a ni bawk a.
Tuna raltlan chambang te hi hriselna lamah enkawl an tul zual thu raltlan tanpuitu zinga mi pakhat chuan a sawi a.
“Tun hma kha chuan KMSS leh Mobile Clinic te hawngin an inenkawl thin a, tunah chuan an sum hman tur bithliah hman zawh a nih tawh avangin an inenkawl thei tawh lo” tiin a sawi a.
Paletwa khawpuiah hian Military council-ten thuneihna an lak atangin hnathawh tur, ei in tur leh zirlai naupangte chhawmdawlna bakah mipuiten harsatna an tawh zual thu hriat a ni bawk.
