Chin State chhim lam, Paletwa township-ah sazu a puan avangin khaw 20 chuanga thlawhhmaah buh leh bal seng tur nei dawn lovah an awm avangin tualchhunga thlawhhma neitu pakhat chuan an harsatna thu a sawi.
Paletwa khawpui leh Sami (Sa Mi) khawpui-ah Mau a rah avangin sazu a puang nasa hle a, thlawhhma nei te, an buh leh bal sazuin a seh nual a, seng tur an neih loh thu Sami khawpuia mi pakhat chuan heti hian a sawi.
“Buh lu chuh laiin a kuang chawpin an seh vek a, Sami khawpuiah buh seng tur an awm lova, buh leh bal seng tur awm lo khaw 20 chuang an awm” tiin Sami khawpuia mi pakhat chuan a sawi.
September thla atang khan Mau thenkhat rah avangin sazuin buh leh bal an ei chhe nual a. Hetia sazu a puan avangin Paletwa khawpuia Abaungta (A Baung Ta) khua, Sethlay (Set Hli) khua, Sanseit (San Seih) khua, Chipalong (Chhi Pa Long) khua, Seitsin (Seih Sin) khua, Laungkadu (Long Ka Du) khua, Inkhuwa (In Khu Wah) khua, Seinletwa (Seing Let Wah) khua, Hadawa (Ha Da Wah) khua tiamin Sami khawpui leh Matupi khawpui Motor kawng kama awm, Sami khawpui chuanhnuai, chuanchung, Paletwa khawpui leh Sami khawpui inkar khuaa thlawhhma nei ten seng tur an neih loh thu hriat a ni.
“Sazu hian a hmatiamin an zawh dawn avangin ral lehlama buh te kan seng lawk a, kawng pawh kan ping nual” tiin Sami khawpuia tualchhung mi pakhat chuan a sawi.
Tualchhung mi ten sazu dan chah nan mei chhit leh thang kam bakah kawng hrang hrangin an dang thin a, a huhova che thin a nih avangin harsatna an tawh thu hriat a ni.
“Sazu an luh avangin buh an ei zo vek a, sazu kal lohna chu tlem te chauh a ni. Buh Tin 50 tharna turah Tin khat pawh kan chang lo” tiin Paletwa khawpuia tualchhung mi pakhat chuan a sawi.
Sazu a puan avangin buh seng tur nei lo ten harsatna an tawk nasa hle a, Paletwa khawpuia kohhran tangrual leh tlawmngai pawl ten in tinah buhfai an tanpui thu hriat a ni bawk.
Kum 2008 khan Chin State, Paletwa khawpuiah Mau a rah avangin sazu a puang chiam tawh a, buh leh bal an ei chhiat nasat avangin ei tur an neih tawh loh thu hriat a ni.
Tualchhung mi ten an sawi dan chuan kum 50 danah Mau a rah thin avangin sazu an puang chiam thin a, sazu rual ten buh leh bal an ei chhiat nual thu an sawi.
