Chin state chhim lam Paletwa township-ah June thla chhungin tualchhung mi, Chin mi 15 aia tlem lo chu Arakan Army ten an man thu Interim Khumi (Chin) Affairs Coordination Committee (IKACC) chuan July ni 7-ah thuchhuah a siam.
Paletwa township, Kaladan lui thlang lam, Arakan Army-te chettlanna hmun chhung khaw 5 vela tualchhung mi 15 aia tlem lo chu AA ten June thla chhungin an man a, tun thlenga an la chhuah loh thu IKACC chuan an tarlang a.
IKACC hruaitu pakhat chuan, “Kan thu dawn danin Arakan Army (AA) pawlin an man zat chu mi 15 vel an ni a, anni chuan AA chu an tihbuai avanga man an tawk nge tih chu hriat chian ni lo mah se, kan hriat thiam dan chuan tuna man tawkte chu mi pangngai khaw chhung mite an ni,” tiin a sawi.
Chung man tawkte chu mi pangngai khaw chhung mi satliah mai an ni a, AA lamin mana kawl reng tur ang chi mite an ni lo.
Paletwa township chhunga Chin mite telin tualchhung mite chu Arakan Army (AA) lamin mana hren zuina chu tualchhunga inrintawkna awmtirna kawngah thil duhawm lo zawk leh inhriat thiam lohna thilte a thlen theih avangin, chutianga man tawk mipuite chu a rang thei ang bera chhuah turin IKAAC chuan a ngen a.
IKACC hruaitu pakhat chuan, “Anni AA pawhin revolution hun lai a nih angin, man chu awm bawk mah se, thu zawhfiah a nih hnuah chhuah leh mai a tha a. Chutiang a nih loh chuan, nakin zelah hnam pakhat leh pakhat inkarah revolution hun chhunga inrem lohna a awm a hlauhawm a, inzahtawnna leh, anni lam chuan sipai dan anga kalpui pawh an ti mai thei, mahse thuzawh fiah a nih tawh chuan him dam taka chhuah leh mai a tha a, hetiang an ti zel dawn a nih chuan hnam pakhat leh pakhat inkarah inhmuh thiam lohna leh ngaihdan hrang awm tur chu kan duh lo a ni,” tiin a sawi.
He mi chungchangah hian Arakan Army (AA) thupuangtu Khaing Tuh Khah chu phone-a biak pawh theih a ni lo a.
Paletwa township-ah May ni 26 atangin military council leh AA te inkarah inkahna a chhuak a, sipai lamah inkarah boruak a tang chho zui a, military council lam pawhin civil mite an man thu hriat a ni.
