Military council ten online booking hmanga passport siam hun February 24 atang khan an hawng ta a, an hawn hnu ni 3 hnuah mi 8500 chuang an tling hman a, tunah khar leh rih a nih thu hriat a ni.
February 27 tuk atang khan passport siam tur ten https://www.passport.gov.mm –ah lutin sum pek lawk a ni a, a chhuah hun nghakin an thlir reng a ni. Passport a thar siam tur te tan kalphung thar an siam dawn avangin siam theih a la ni lova, online booking hmanga siam hun tur hriattir a nih leh dawn niin an sawi.
“ February 24-ah kan theh lut hlawm a, ni 25,26-ah ni khat chauh a awl a, a luh theih bawk si lo. An hun tiam angin February 24-26 thleng khan mi 8529 kan theh lut a, a chhuah hun tur nghakin kan thlir reng a. A thar siam tur te tan a la theih lova, rin aia passport siam kan tam avangin an khar rih a nih kan ring” tiin passport siamtu mi pakhat chuan a sawi a ni.
Hmun hlaa awm khaw thenkhat thalai rual ten passport siam nan online hman dan an thiam vak loh avangin harsatna a tawh thu hmun hlaa awm mi pakhat hnen atanga hriat a ni.
“February 24,25,26 ni 3 chhung hawn a ni a, khawpui mi ten an theh lut nasa hle a. Hmun hlaa awm te tan chuan internet a that tawk loh avang leh khawih thiam an awm vak lo a. Keini Khin U khua atang pawhin internet thatna hmun Mandalay khawpuiah kan kal a, duh thu a sam chuang lo” tiin Khin U township-a tleirawl pakhat chuan a sawi a ni.
Military council ten kum 2022 December thla atangin passport an pek chhuah tawh loh, thla 2 leh a chanve hnuah online hmanga an pek chhuah leh thu hriat a ni.
