Magwe region, Pauk township, Zeetaw khua April 24 chawhnu dar 2:00 vel khan Military council sipai hnuaia Phyusawhti pawl ten an luh chilh a, tualchhung mi pakhat an thah bakah chenna in 150 vel an hal thu tualchhung mite leh PDF pawl ten an sawi a.
Zeetaw khuaa rilru lam chiang lo kum 40 mi mipa pakhat an thah hnuah an hal nghal thu tualchhung miten an sawi a.
April 24 chawhnu dar 1:00 vel khan Pauk khuaa innghat PDF te leh PinTaung khuaa Phyusawhti ten Zeetaw khaw tlak lam tuikawr kianga an inbeihnaah Phyusawhti mi 4 an thi tiin an sawi a.
Phyusawhti pawl ten an luh chilhna chungchangah security hming thup pakhat chuan heti hian FRA Media a hrilh a.
“April 24 khan Zeetaw khuaah In 150 an hal a, tualchhung mipuite ramhnuaiah an tlanchhe vek va, tlan ve thei lo kum 40 rilru lama chiang lo mipa pakhat an hal hlum” tiin a sawi.
In 200 chuang awmna Zeetaw khua tum 3 an hal tawhnaah tun tum hi an hal tam ber tum a ni a. Zeetaw khaw kianga TaPyiEi khua pawh ThitChoeKone khuaa Phyusawhti ten chawlhkar liam taah khan an hal tawh thu tualchhung miten an sawi.
Zeetaw chhim lam zara khaw awm te Phyusawhti pawl te nen an inhnaih avanga tualchhung mi te an tlanchhiatna hi kum khat a chuan tawh thu tualchhung miten an sawi bawk.
He inbeihna chungchangah Magwe region, Military council thupuangtu Phone-a an zawhnaah chhanna an la awm rih lo a ni.
Data For Myanmar ten kum 2023 March 19 thlenga an chhinchhiah dan chuan Military council ten thuneihna an lak hnu atangin kumin 2023 February 28 thleng khan Military council sipaite leh a kut hnuaia pawl ten chenna in 9019 an hal chhiat tawh thu an tar lang a ni.
