Magwe region, Pauk township chhim lam khuaah May 29 tuk atang khan Military council sipaiten an luh chilh a, chenna in an hal nasat avangin tualchhung mi 5000 chuang in leh lo an tlansan thu tualchhung miten RFA Media an hrilh a.
Heng Military council sipai 100 rual vel te hian May 24 atang khan a khaw tahtawlin chenna in an hal thu hriat a ni a.
Military council sipaite hian khaw 7 an hal avangin tualchhung mi 5000 chuang an tlanchhiat thu hriat a ni a.
Heng Military council sipaite hian May 29 tuk atang khan ChaungNa khua atangin an hal tan thu ChaungNa khuaa security zinga thuneitu hming thup pakhat chuan RFA Media hnenah heti hian a sawi a.
“Kan awmna khuaa chenna in an hal chhe vek a, kan ran te pawh ni sa karah an awm reng a. Zanah ruahpui vanawn a sur a, tuilianin an len ta nge kan hre lo. Tui a len avangin tlanchhia an awm nual bawk a, kan mangang tak zet a ni” tiin a sawi a.
Military council sipaite hian chenna in 120 chuang awmna ChaungNa khua an hal chhe vek tiin an sawi a. PyitTe khua, TeTaw khua leh ChuangNa khuaah Military council sipaite an la awm rih avangin an tlawh ngam rih lova, thi leh hliam zat a hriat theih rih loh thu tualchhung miten an sawi a.
He inbeihna chungchangah hian Magwe region, Military council sipai thupuangtu RFA Media-ten phone hmanga an zawhnaah chhanna a awm rih lo a ni.
Pauk khua chhim lama raltlan mi mangangte tanpuitu pawl Successful Force-Pauk pawl, information-a thuneitu Ko Leih Pya (Leih Pia) chuan heng raltlan mi mangangte hi ei in leh damdawi an mamawh zual hle thu RFA Media hnenah a sawi a.
Pakukku district PDF Battalion 18-a information thuneitu pakhat chuan Military council sipaiten an luh chilh lai hian PDF tangrual pawlten duh angin an hmachhawn theih loh thu RFA Media an hrilh a.
“Keini chuan Phyusawhti pawl leh police te chu kan dang thei a, Military council sipaite erawh kan dang thei lo. An vaia kan hmachhawn dawn chuan NUG-ten sipai leh ralthuam min puih hle a tul dawn a ni” tiin an sawi a.
Pauk township-ah hian Military council sipaite thlawptu Phyusawhti pawlte an tam avangin Military council sipaiten khawmual atangin operation an neih theih thu an sawi a.
Magwe region-ah ralthuam beihna avangin tualchhung mipui nuai 5 chuang in leh lo an tlansan tawh thu UN OCHA-ten May 6 khan an thuchhuahah an tar lang a ni.
