Chin state, Tedim khuaa Non-CDM education staff te nena inkungkaih PDF-Zoland hriattirna thuchhuah loud-speaker hmanga puangtu Shalom Youth Committee, tlawmngai pawl member pahnihte chu June ni 27-ah military council ten an man thu hriat a ni.
Tedim khaw chhunga awm pakhat chuan, “Anni chu tlawmngai pawl an ni a. A changin anmahni loud-speaker hmangin veng chhung chhiat that chunchang pawh an puang mai zel a. Tunah pawh PDF-Zoland ten school hawn chungchanga an thuchhuah chu an dawng a nih hmel a, chu chu an loud-spaker hmangin an puang kan ti dawn nge, sipai lamin an hruai chhuak a. Pakhat chu zirtirtu a ni a, pakhat erawh chu loud-speaker an dahna in neitu a ni,” tiin a sawi.
Shalom Youth Committee member pahnih man tawkte chu Ko In Khan Mung leh Ko Lian Za Mung te an ni a, anni chu Tedim khua police station-ah dahin Tedim khua station officer chuan Tactical commander thutlukna ang ang a ni ang ti mah se, tun thlengin an la kawl reng thu hriat a ni a.
Chin People Force pakhat PDF-Zoland chuan June ni 25-ah pawh Tedim khaw chhunga awm Non-CDM education staff te, bording school-a thawkte, zirlai nu leh pate, khawtlang upate leh sakhaw hriattirna lehkha sem a tichhuak tawh a ni.
Chu thuchhuahah chuan military council hawn school hrang hranga thawk Non-CDM education staff te, firfiak pawl nena inzawmna nei Bording (hostel) school-a luhtir naupang nu leh pate, firfiak pawl nena thawk hova school hawn tum, hawng tura nawr tute, ruahmanna siamtu khawtlang upa thenkhat te leh sakhaw hruaitute chu June ni 28 ral hma ngeia an thiltih chawlhsan nghal tur leh an zawm lo a nih chuan Tedim khuaah inkah buaina chhuak hmachhawnin, engpawh thleng se ZFU/PDF-Zoland chu mawhpuh lo tura hriattir lawk an nih thu tarlan a ni a.
PDF-Zoland hruaitu pakhat chuan, “Thuchhauh chu Myanmar tawnga lehlin a nih takah chuan a rum deuh hlek a. Zirna tak tak ni lo system thlawp zawnga phusa lo turin kan vaukhan a ni. School chu hawng mah se, school lut tlem ta chu he laia PDF te hming tihchhiat tuma an school hawnah buaina engemaw thisen chhuahna thlentirin PDF te tih anga thil awm thei a nih angin kan vaukhan lawk a. Chutiang thil chu school thenkhatah a thleng a nih chuan keini kan ni lo, tuna ti mek, thutlukna siamte, thlawptute thutlukna avanga a nih thu kan hriattir a ni,” tiin a sawi.
Military council sipai pawl chuan June thla tir atangin Myanmar ram pumah school a hawng a, CDM tamna Chin state khuaah chuan school thenkhat chauh hawn theih a ni a. Tedim khaw chhunga High School no. 1, leh 2 te chu hawng mah se, school naupang 40 vel chiah an awm thu hriat a ni.
