Thuneihna latu Sr. Gen. Min Aung Hlaian ethnic armed organization (EAO) pawl nen inbikana nei turin April ni 22 khan ram chhung TV kaltlangin a sawm a. Military council Peace Talk sawmna atangin eng rah chhuah nge awm thei. Tuna politics leh indo buainate a chingfel thei ang em? He mi chungchangah Chin politics zirchiangtu leh tuna Chin National League of Democracy (CNLD) secretary Salai Ceu Bik Thawng, interview hi i lo ngaihthla ang u.
Zawhna: Sr. Gen. Min Aung Hlaian Ethnic Armed Organization (EAO) pawl chu April ni 22 khan Peace Talk neihpui turin a sawm a. Chu remna kawng zawnga inbiakna chu engtin nge i hmuh dan?
Chhanna: Keini chuan kan pawm lo. Ethnic Armed group hruaitute pawh tel chi a ni lo tiin ka chah nghal duh bawk. A chhan chu Min Aung Hlaia hian remna dik tak hmangin, ram chhung politics, ethnic ho buaina chinfel tuma sawm a ni lo. Tun hma 1990 vela an sipai sorkar-in din pawlho hamthatna tur chiah en a ni a, inremna hna thawk ang leka tih an tum a. Tuna kan do mek, a bikin Spring Revolution hmanga kalpui kan tum din thar lehna leh ethnic mite mahni inrelbawlna, leh ethnic union din thei turin he peace talk hmang hian kal theih a ni dawn lo a ni.
Zawhna: Sr. Gen. Min Aung Hlai hian eng tum nein nge tuna inremna thu sawiho tura a sawm?
Chhanna: Pakhatnaah chuan tuna Spring Revolution hi an tan chuan do lettu zawk ang an ni a. Attacking zawnga bei thei tur dinhmunah pawh an awm tawh meuh lova, tlan chhuahna an zawng a ni ber mai. A bikin, Ethnic Armed Organization (EAO)-ten Spring Revolution hi an tihchak em avangin, an buai phah a, EAO ho chu he sawmna hmanga Spring Revolution-a tel thei lo turin ruahmanna a siam a. A pahnihna chu ethnic mite leh ralthuam keng dangte inkarah he remna thu hmanga inthenhrantir a duh a. Ethnic mite inlungrualna pawh he kawng bawka tihchhiat a duh a ni. Tunah pawh engemaw chen chu an kerhdarh tawh a. Entirnan, pawl thenkhata hruaitute inkarah pawh ngaihdan inang lovin, an inhnial tan der tawh a. Ani chuan kawng leh lamah, a khingpui hmelma ethnic ralthuam keng pawlte leh he Revolution-a tel zawng zawngte inkara inremna chu tihchhiat vek a tum a. A nihna taka a rilruah chuan ram chhung politics buaina chinfel tumna a nei lo hrim hrim a ni.
Zawhna: Military remna inbiakna (peace dialogue) atangin eng rah chhuah nge awm thei tura i beisei?
Chhanna: Hei hi chu a hma ang tho a ni ang. A chanve vel chu an tel leh ang. Ethnic ralthuam keng pawla a chanve tel turte chu a hriat theih vek a. A tel turte chu tuna NCA-a hming ziakho zinga a chanve vel an ni ang a. Mahse chung ho chu pawl chak tak an ni lo. Leh lamah chuan pawl chak tak pawh an tel tho a. Wa, RCSS te an ni a. Mahse anni chuan an hruaitu lute an tir dawn lo. Dan pangngai ang lekin a lu lama mite ni lo, an tir leh ang a, eng rah chhuah vak a awm thei lo. Chuvangin, he inbiakna atang hian ram chhung buaina a tikiam thei dawn lova, tuna military council do mekte chu kan tel dawn lova. Chuvangin, Min Aung Hlaia sawmna leh a thil ruahmanna hian ram chhung buaina leh tuna indona hi a tikiam dawn lo. Eng zawhkhawk mah a nei lo vang, inthlak danglamna a thlen dawn bawk lo a ni.
