State counselor Daw Aung San Suu Kyi thubuai siamsaka puhna a nihna helicopter lei chungchang case-a a khingtute finfiahna ngaihthlak leh enfiahna hun court-ah neih a ni a.
Mahse, a khingtu lam, Anti-corruption commission investigation director U Aung Khan chu Pi Suu Kyii ukilten thu an zawhfiahnaah helicopter lei chungchang nena inkungkaih finfiahna document, Kawl tawnga lehlin pawh engmah a neih loh thu court lamin an sawi a ni.
A nihna takah chuan May thla tawp chawlhkara court neih niah chung document te chu court-a hmuh tura tih a lo ni tawh a, chuvangin June ni 6 court-a keng tura tih an ni a. Mahse, tun tumah pawh an la neih loh avangin, June ni 13 chu hun tiam tha lehin court ni sawn hlat leh a ni.
He thubuai laimu tak chu ‘Pi Suu Kyi-in a thuneihna hmang sualin, helicopter a lei a, a hawh kual tir bawk a ni,’ tiin military council-in an puh a. Chutih rualin President U Win Myint leh Social welfare relief & Resettlement Minister Dr. Win Myat Aye te pawh Anti-corruption law section 55 hmanga thubuai siam an ni a.
Kumin Jun ni 19-a kum 77 tling tur Pi Aung San Suu Kyi chu kum 100 thleng jail tan theihna thubuai siamsak niin, military council-in a la hren reng a. Leh lamah a chhungten hetianga hren a ni hi International law-a Arbitrary Dentention a ni tiin UN lamah an zual ko ve mek bawk a ni.
