State counselor Daw Aung San Suu Khi chu Naypyidaw jail lamah dah luh a ni tawh a, chutianga a tan laiin, a u Aung San Oo chuan an chhungkaw In, ro chan duh avanga court lama thubuai a theh luh chu June ni 27-ah ngaihtuah a nih leh thu hriat a ni.
Pi Suu Kyii, kum 15 chhung House Arrest-a a awmna, tuna a u nena an inchuh mek, Yangon University Yeihta kawng, compound no. 54-a in awm chu nikum October thla khan Aung San Oo chuan court lamah zual koin special appeal a theh lut a, chu chu court lamin an lo pawm a.
Court chuan thla 3 chhungin thutlukna a siam dawn a, tun hi a tawpna ber tur order a nih thu Aung San Oo-a ukil U Aye Lwin thusawi chu AP news chuan a tarlang a ni.
He thubuaia thutlukna siam har ber pakhat chu ro chu engtia insem tur nge tih a ni a, a in hlut zawng chu dollar maktaduai 90 vel a ni a, mahse chu rate chu nemngheh theih a la ni lo a, chutih rualin Pi Suu Kyii te lam ukil te biak pawh theih an nih loh thu hriat a ni bawk a.’U Aung San Oo chuan a farnu Daw Aung San Suu Khi chu kum 2000-a court-a a khin hmain kum 10 chuang US lamah a awm daih tawh a. Court lamin kum 2001-ah a khinna chu a hnawlsak a, chuti chungin kum 10 hnuah pawh ro chan tumin vawi engemaw zat a la buaipui a ni.
Mi tam tak chuan Daw Aung San Suu Kyi tihmualpho tuma a beihna chu sipai lamin an thlawp tlat a, hlawhtling ngei tur pawha an tanpui an rin thu an sawi a.
Kum 2016-ah Yangon Western District Court chuan an unau inkarah ro chu insem turin thutlukna siam mah se, chu thutlukna chu dik tawk lo leh in chu hralha a suma insem turin Aung San Oo chuan court lamah a zual ko leh a, mahse court chuan a lo hnawl a. Sipaiin thuneihna an lak hnu, ni kum khan court chuan Aung San Oo-a appeal-na chu a pawm ta a ni.
Kum 77 tling tawh Daw Aung San Suu Kyi chu thuneihna latu sipaiten thubuai tam tak siamsakin kum 100 chuang lung in tan theihna case neiin a awm mek a. Politics khawvel atanga dah bo a nih mek laiin, a ro neih chhun a in chu hralhral tumin a u-in a lo buaipui ve mek bawk a.
Yinya dil kama Colony huna lai design-a sak chhawng hnih in, huan acre 2 vela zau chu kum 1947 July-a Bogyoke Aung San thah a nih hnuah a nupui Daw Khin Kyi chu sorkarin a pek a ni a. Chu inah chuan kum 1990 inthlan hma, 1989 atanga 2010 thleng, house arrest vawi 3 tawkin kum 15 a lo khawsa tawh a. Chuta khung a nih laiin a thian that thenkhat nen an khawsa a, ei tur pawh an neih mumal loh avangin chu ina furniture thenkhat chu an lo hralh hial tawh a ni.
Chu mi hnuah Daw Ang Sun Kyi chu politics lamah inhmang chho leh theiin chu in chu an party hmun pui ber ang hial ni chhovin, EUS ex-President Obama, Foreign ex-Minister Hillary Clinton, UN General Secretary hlui Bang Ki Moon, Hollywood Film star Michell Yu leh khawvel mi lar tam takin an lo tlawh tawh bawk a ni.
