Shan State, Pinlaung khawpuiah Nam Nang khua, Buddhist school-a puithiam 3 leh mipui a huho PDF-ah puhin an thah chiam thu Military council sipaite Telegram-ah thlalak nen an tarlan thu hriat a ni.
Military council sipaite Haing Way, Ko Thet Telegram channel-a an tarlan dan chuan March 11 atangin Buddhist puithiam school-ah Kayah PDF te hmuh an ni a, sniper-a kah hlum an nih thu leh March 12-ah “Kayah Padet tih thupui hmangin Demoso khaw bulah March 10 khan Kayah Padet ten Buddhist school-a Military council sipaite an kap a, Military council sipai ten an chhan let chuan Building an chhe nasa dawn sia. Military council sipai ten sniper-in Padet 24 an kap hlum a. Thlalak kan hmuh zel chuan kan upload zel ang” tiin an kah hlum tak leh thlalakte an tarlang a ni.
Military council sipai ten an Telegram-a an tarlan tak an thah ruang te hi Pinlaung khawpui, Nam Nang khuaa Buddhist school-ah Military council sipai ten mipui a huhova an thah thlalak te an ni a. Heng an thah tak te hi buddhist puithiam 3 leh mipui ruang te an nih hlawm thu March 12 khan PDF ten an hmuh thu hriat a ni.
“Nam Nang khua Buddhist school-ah Military council sipai ten Buddhist puithiam 3 leh tualchhung mipui 20 chuang ruang hmuh a ni a. Military council sipaite leh Kayin Ni tangrual te inkahnaah hian Military council sipai an thih tam avangin phuba lak nan an thah te an ni” tiin PDF news chuan a tarlang a ni.
Military council sipai ten kum 2023 March 11 khan Pinlaung township Nam Nang khua Buddhist school hmuna awm buddhist puithiam leh mipui a huho an that a. Hemi ni chawhnu dar 4:00 velah chung lam atangin ralthuam lianin an beih hnuah an luhchilh nghal thu hriat a ni.
Heng an thah tak buddhist puithiam 3, mipui 28 ruang te hi KNDF,PDF leh KA duty ten an hmu a, tualchhung mi 30 chuang chin hriat lova an awm thu hriat a ni.
Heng an ruang hmuh te hi KNDF ten la chhuakin an buaipui nghal a, an sakhua tih dan angin an vui hlawm thu hriat a ni bawk.
He chhiatna avangin KNDF, KA, Shan Taung PDF, PDF Phekhone, Moe Be, DMO PDF tangrual ten hma la lehin Military council sipaite chhang let turin an inpuahchah thu KNDF ten an thuchhuahah an tarlang a ni.
