Politics chungchanga rilru putzia emaw ngaih dan (political attitude) tih chuan ram leh khawtlang rorelna inthlakthleng duh dan chungchanga ngaih dan leh hmuh dan a kawk a. Chu politics rilru chu a tlangpuiin chi thuma then thin a ni. Chu ngaih dan chi thum hmang chuan tunlai kan ram politics inlumlet dan chungchanga ngaih dan awm mekte kan thlir thuak thuak ang a. A sawifiahna (key term) atan Myanmar danpui (2008 Constitution) kan hmang dawn a nia.
A pakhatna chu Conservatives tih a ni a, inthlakthleng ngai thei lo leh tul ti lova awm dan phung pangai vawn him duhtute an ni. Conservatives-ho chuan sorkar leh pawlho (institutions)-te hian ram rorelna kaltluanna leh nghehna (order and stability) an vawng him tur niin an ngai ber a, chu chu an dah pawimawh ber. Thil tih dan phung pangai tluang taka a kal theih chhung chu inthlakthleng leh insawi danglam vak tul an ti lo. Tihdan phung thlakthleng hian ram leh khawtlang nunhona a chawk buai a, nunphung a khaihlak phah thin. Chuvangin, loh theih loh thilte a nih loh chuan inthlakthleng tul an ti lo a ni ber mai.
Myanmar politics huang chhunga he ngaih dan vuantute chu Sipai leh a thlawptute hi an ni kan ti thei awm e. Kan hriat theuh angin Sipai thuneihna hnuaia kan luh tan kum, 1962 atanga 2008 Danpui hmanga democracy rim nam kan hriat ve hnu leh kumin February 1-a Sipaiin thuneihna pumhlum an lak leh hnu vawiin thleng hian Myanmar politics kalphung nghet chu “Sipai thuneihna” hi a ni. Myanmar mipuiin Democracy rim tlem te nam ve deuh kan hnim ve theih hun kum 10 (2010-2020) chhung pawh khan 2008 Danpuiin Sipai thuneihna a hum tlatzia leh a vohbikzia kan hriat theuh kha. Kha khalphung pangai kha vawn nun reng duhtu, a aia democracy changtlung leh puitling zawk lo piang tur hlau leh duh lotute chu Sipai leh a thlawptute an nih avangin anni hi Conservative ngaih dan neitute chu an ni kan ti thei ang.
A pahnihna chu Radicals tih a ni a, kal dan phung pangai chu a bulthut atanga thlakthleng fai vek duhtute an ni. Radicals-te chuan kalphung awmsa hman mek chu siam thatin awmzia a nei lova, a pumpuia thiaha vawi leh khata thlakthleng tawp tur niin an ngai. Politics kalphung thar (new politics system) duan a nih loh chuan kalphung pangai awmsa-ah hmasawnna a awm thei lo niin an ngai nghet bur mai a ni.
Tun dinhmuna Myanmar politics huang chhunga he ngaih dan vuantute chu 2008 Danpui thiata Danpui thar hmanga thlakthleng tawp duhtu Taing Yin Tha ralthuam keng pawl (Ethnic Armed Groups)-te leh February 1-a Sipaiin thuneihna an lak (military coup) duh lova, do lettu pawl hrang hrang (e.g, CRPH leh CDM kalpuitu sorkar hnathawk)-te leh ni tin kawng zawha feh chhuak mipui-te hi an ni awm e. Heng mite hian Sipai Sorkar phuahchawp hi kum khat chhung sawi loh, ni khat pawh ram rorelnaa inrawlhtir an duh lo va, Myanmar politics huang ata Sipai thuneihna hrim hrim nawr chhuah an duh a. NLD Party sorkar aiawhtu CRPH pawhin an hmachhawp atan sipai thuneihna humhimtu kum 2008 Danpui thlakthleng tawp an tum thu an chhuah hial tawh a ni.
A pathumna chu Moderates tih a ni a. Hei hi kal dan phung pangai hian tihdanglam leh siam that chu a mamawh ngei a; mahse, he kal dan phung awmsa huang chhung atang ngei hian muang changa a tah tawl te tea inthlakthleng hret hret tur a ni tih ngaih dan a ni deuh ber. Moderates-te chuan inthlakthlengna leh siam thatna hi kalphung pangai awmsa chhung atangin muang chang changa tih puitlin leh dawhthei taka nghah chhuah theih a ni a, kalphung thar duanga a pumpuia inthlakthleng rupna thleng tura phut kher a ngai lo an ti a ni.
Tun dinhmuna Myanmar ram chhunga he ngaih dan vuantute chu Sipai thuneihna duh bik lo anga inchhal; mahse, Sipai hruaitu ten an sawi anga kum khat chhunga lo awm tur inthlanna buatsaih hun nghak a, Sipai sorkar phuahchawp kaihhruaina hnuaia dawh thei taka kun a, Sipai duh dan anga muang changa inthlakthlengna kawng zawh mai tur a ni titu pawlho leh mipuite hi an ni awm e. Heng mite hian Sipai thuchhuah leh thutiam an awih a, Sipaiah rinna an la nghat lian hle tih a hriat a. Radicals-ho anga kawng zawh leh CDM thlawpa sipai kutthak tawrh hi atthlak mai niin an ngai a tih theih awm e.
He ngaih dan leh rilru chi thum hi hre rengin kum 2010 atanga vawiin thlenga Aung San Su Kyi leh a kaihhruai NLD Party dinhmun leh politics rilru lo en leh thuak ila. Kum 2010 inthlanpuiah khan ASSK leh NLD chuan radical rilru puin Sipai Sorkar buatsaih inthlanna kha an ring lo va, an pawm loh avangin inthlanpuiah khan an tel duh lo va. Kum 1990 inthlan result zawk chu pawmsak a nih theih nan tan an khawh lui tlat a nih kha.
Amaherawhchu, Sipai kaihhruai kalphung zawm lova, a pawn lam mi ni reng tura Radical rilru pu chunga ram chhung politics siam that chu a tan a rem lo niin ASSK-i khan a ngai a ni ngei ang. Sipai kaihhruaina hnuaia a theih ang tawka ram siam that hna a thawh theih zawk inbeiseiin Sipai kaihhruaina kalphung chhung chu kum 2012 by-election atangin a rawn luh chilh ta a. Kum 2010-a Radical rilru kha kum 2012-ah chuan Moderate rilru-in a thlak ta tihna a nih chu.
Chu Moderate rilru hmang chuan ASSK-i khan Sipai nena inlaichinna tha zawk siam a, a theih chen chen thawk duna ram siam that hna thawh a tum ngar ngar a. Hnam khawngaihthlak tak Rohingya-ho laka Sipai chet dan rawng tak tak pawh dem ngam lovin ICJ hmaah pawh Sipai hruaitute aiawhin a ding a.
Amah ngaisanga lo chawimawitu khawvel ram hrang leh hnam hrang hrangte deu sawh leh cheksawlh pawh hlawh phah hialin Myanmar ram hma hun thui tak a thlir a, Sipaite thawhpui chunga muangchanga Myanmar ram thlakthleng tumin Moderate rilru a vawng ngar ngar a. Chu rilru pu chung chuan a chep thei ang bera amah khuahkhirh a, nupa leh chhungkaw nun nawmna zawng zawng pawh tihchhiat sak vektu Sipaite chu a thawhpui ngar ngar a nih kha.
Chu ASSK leh a kaihhruai NLD party-te Moderate rilru chu kumin February 1-a Sipai thuneihna pawng lakna chuan a rawn vaw chhe leh ta vek a. Moderate rilru pua Sipai duh dan zawm zel chunga ram siam that tum hian awmzia a lo nei meuh lo a ni tih hi tuna NLD party aiawh CRPH ngaih dan chu a ni lo thei ta lo a ni. Chuvangin, ASSK leh NLD hian kum 2012 hma lamah Radical rilru an pu a, kum 2012 atangin Moderate rilru an pu leh a. Amaherawhchu, kum 2021 February 1 atangin hun rei pawh nghah ngai deuh mah se, muang changa Myanmar politics siam that hna thawhpui theih tura an lo beisei; mahse, an thuneihna vawn him loh ai chuan pawisawi lo mipui pawh ral beiha beih leh kah hlum tawp tawp pawisa lo, an thuneihna humhima vawn nun reng duhtu Conservative Sipai hruaitu mawl leh sual kawp tlatte chuan Radical rilru pu lo thei lo turin NLD party chu an siam leh ta a ni kan ti thei awm e.
Kan zingah tuna Sipaiin sorkarna a pawng lak duh loh avanga 2008 Danpui thiat a, sorkar thuneihna huanga Sipai inrawlhna hrim hrim duh lova, thlakthleng tawp duhna Radical rilru pua CDM thlawptute leh kawng zawhtute dem a, intifing taka Moderate rilru pua muangchanga inthlakthleng nghah ve fan fan tur a lawm titu an awm nual a. Heng mite hian Sipai thusawi leh thutiam an awihin sipaiah rinna an la nghat a ni tih an rilru putziaah a lang chiang a. Kum 2008 Danpui vawng him a, Sipai kaihhruaina hnuaia sipaiin a phal ang tawk a pek chhuah sa hrang chu mipui ten lawm taka lo insem ve dial dial kha an beisei phak tawk chu a ni ber awm e.
Amaherawhchu, tun tum military coup hian Sipai rilru chu rintlak a nih lohzia a tar lang chiang ta hle a. Muangchanga hun rei tak chhunga an thuneihna tlem te tea paih thlak hret hret pawh an duh lo va. An thuneihna paih thla thei tur ang zawnga hmalakna reng reng chu an rem tih lohzia an lantir a. Kum 2008 Danpui vawn him hi an thuneihna vawn himna a ni tihah an chiang a. He Sipai Conservative rilru hi inthlak thlengna dik tak lo thleng a, Democracy sorkar din duhtu Radical rilru hmanga beih let a tul ta a ni tihah Myanmar mipuite an harh chiang ta hle a. Mahni nunna hial pawh chan huamin Myanmar siam thatna khawfing tichat turin Sipai thuneihna zan thim chhah tak hi natna leh thihna ruam atangin an hmachhawn mek a nih hi.
He dawt hmanga thuneihna pawng latu sipai sorkar suak beih letnaah hian thalai leh rawlthar duhawm tak takin tharum thawh ve leh thisen chhuah duh lovin an nunna thap zawkin an inhlan mek a. Sorkar thawktu tam takin an chawbel leh nunna chan huamin an bei mek bawk. Keini hi Conservative rilru pu a, Sipai thlawptu zingah kan la tel em? Nge, Sipaia rinna nghata Sipai thusawi awiha an rem tih hun huna mipuite hnena zalenna them pek a, an duh hun huna an zalenna rah behsak leh pawh pawi ti lova, an ruala ke pen tura intifing taka Moderate rilru put reng kan la tum zawk le? Moderate rilru hi dinhmun pangai takah chuan put theih a duhawm ber mahna! Radical taka chet ngai lova Moderate rilru nena siam thatna kawng kan zawh theih hun a lo thlen hma chuan, Sipai leh a thuneihna hi Radical rilru pu chunga kan theih leh thiam dan kawng theuhva lungrual taka kan beih let a la ngai rih a nih ber hi!
Pawisawi lo mipui ten thisen chhuak leh thi khawp hiala Sipai thuneihna sual doral an beih mekna hi Pathianin malsawmin hlawhtlintir hram se la. Myanmarah hian dikna, zalenna, remna leh hmangaihna a taka tihhlawhtlin, lo niin Pathianin a lalram min dinsak mawlh rawh se!
