Militay council sipaiten Febraury ni 1-a thuneihna an lak khan President U Win Myint chu manin, hriselna chhuanlama a nihna atanga bang turin an nawr lui tih President chuan vawiin lama court-naah a sawi chhuak tih hriat a ni.
October ni 12-a Naypyidaw special court room-a criminal law section 505 (b) hmanga thubuai siamsak a nih chungchanga a tuartu leh thuhretu President U Win Myint thuzawh fiah a nih laiin President chuan man a tawh lai boruak a sawi chhuah thu a ukilten an sawi.
A ukil pawl chuan, “U Win Myint chu an zawt tan a, thuhretu anga thu zawh fiah a ni a, an thu zawhfiahnaah chuan engtik ni a, man nge a nih tih leh thil tihsual a neih loh thute a sawifiah a. Chutia a sawi chhuahnaah Febraury 2021 ni 1, zing lam dar 5 vela man a nih laia, sipai General tuemaw pahnih lo tut a, a hriselna chhuan lama President nihna atanga inhnukdawk turin an hrilh a. Mahse President chuan a hriselna a that avangin, a inhnuhdawh theih loh thuin a chhang a. Chutah anni chuan ngaihtuah tha leh tur leh mimal tan pawha a that loh tur an hrilh a. Mahse, U Win Myint chuan a inhnuhdawh theih loh thu leh mimal tana a pawi dawn a nih pawha a thi chilh mai tur thu a hrilh a. Chu bakah U Win Myint chuan dan anga in kal a ngai a, thuneihna la tur in ni lo tia a sawi bawk thu court chu a hrilh a ni,” tiin an sawi.
President U Win Myint chuan he thubuai chungchangah NLD central working committee list-a hming chuan vang maia thil sual ti anga inpuhna chu awmzia a neih loh thu leh finfiahna awm lova inpuhna mai a nih thu a a sawi chhuak bawk tih hriat a ni.
Sorkar a khingtu lam Ukil chuan zawhna a zawhnaah U Win Myint chu CRPH, NUG leh PDF pawlte din an nih thu i hria em? PDF pawkten rel kawngte, mipui awmna hmunte bomb-in, mipui venghimtu sipaite chu ralthuam hmangin an bei a, pawisawi lo sipai report pe thinte pawh Dalan tia puhin an that bawk tih i hria em, tiin a zawt a. Ani chuan man tawk leh khung hran a nih avanga a hriat loh thu a sawi a, chutianga inpuhna zawhna thenkhat zawh a nih leh dawn chuan Ukil pawl lamin an pawm loh thu sawi chhuakin an tihtawptir tih hriat a ni.
October ni 12 court ni chuan Pi Aung San Suu Kyi-i U Nyi Nyi-an a puhna Natural Disaster law section 25 hmanga thubuai chu court-in thupuitlingah ngaiin a ngaihtuah chhunzawm zel dawn nge tih chungchangah, leh lam leh lama thusawite chu court-a theh luh a nih thu hriat a ni bawk.
