Myanmar ram chhungah kum 2022, thla thum chhungin rahpuah bomb phum la puak lo, tam tak sut loh avangin, civil mi inhliam leh thi 100 thleng an awm a, chung zingah vanduaia thi naupang 37 telin, hmun thuma thena hmun khat ang vel an nih thu UN-in thuchhuah a siam.
Rahpuah bomb la puak lo leh indona ralthuam chambangte chuan Myanmar ram chhunga inkahna hmuna awm civil mite nunna leh khawsakna kawngah harsatna lian tak a siam reng a.
Tun hnai, chawlhkar hnih vel liam ta chhung khan Shan state hmar lam leh Arakan state-ah bomb phum chi tum 4 zet a puah thu tualchhung miten an sawi a ni.
Ram puma thi zat mi 100 zingah Shan state-a mi 67 niin, an tam ber a, Kachin state-ah 12, Arakan state-ah 8 an awm bawk.
Shan state hmar lam, Chauh-Me township, Pan-Ta-lin khuaa kum 13 mi naupang pakhat chu May ni 5-a, Thingpui huan atanga a haw kawngah rahpuah bomb rap fuh palhin, a inhliam a. Nam-Truu township Man-Sa-Long khaw hlam, Naa-Pein khuaa kum 26 mi, mipa pawh May ni 19-ah, a huan atanga a haw kawngah bomb phum rap puaka a inhliam thu UN report-ah tarlan a ni.
Chu bakah Arakan state, Ann township, Daa-Let khuaa kum 30 mi, mipui leh Minn-Piaa township Pann-Miaung khuaa kum 68 mi mipate pawh May ni 14 leh 15-ah bomb phum rap puaka an thih thu hriat a ni.
Myanmar ramah sipaiin thuneihna a lakna chu kum 1 chuang a ni tawh a. Chu mi chhungin ram chhung sumdawnna, khawsakna, hriselna leh thil dang chi hrang hrang chu tlak hniam lam a pan zel a. Chutih rualin military council sipaite ep ber mipui venghimtu pawl leh ethnic ralthuam kengpawlte nena indona chu a zual zel bawk a ni.
Political prisoner tanpuitu pawl (AAPP) thuchhuah danin thuneihna lak atanga kum khat chhungin lekin military council sipaite kah hlum, pawisawi lo mipui 1844 awmin, man leh hren tawk 13713 thleng an awm tawh thu hriat a ni.
