Rakhine atanga raltlante kir leh an harsat

0

Rakhine State atanga raltlante an awmnaa kir leh turin Military council ten hmanni lawka an puan tawh hnuah vawiin thlengin kir leh an harsat thu raltlan zinga mi ten Mizzima Media an hrilh a.

Military council sipai ten an khaw chhehvelah camp an siamsak bakah tun hma an inkahna hmun chhehvela bomb kam te, an then fai loh avangin kir leh an hlauthawng a ni.

Heng avang hian a khaw chhehvela camp siam tawh te leh an bomb kam tawh te thian fai turin raltlan haw tur ten Military council sipai te hnenah an ngen a ni.

“Minister te an rawn kal tum khan duh chuan kan kir nghal thei. Kir leh in awm chuan ei in tur thla 3 daih leh Kyats nuai 6 kan pe ang che u min ti a. Keini chuan bomb kam then fai tur te, a khaw chhehvelah camp thiat tur te, hnathawh tur te leh chhawmdawlna kan dil” tiin Buthidaung (Bu Ti Tong) township, Lan Ma Chaung raltlan camp-a raltlan mi pakhat chuan Mizzima Media a hrilh a ni.

Haw leh duh mah ila, kum 2 vel an hal chhiat tawh in leh lo din leh turin an harsat tawh hle a. Eng hun thleng nge a buai leh dawn kan hre lova, thla 3 daih tur ei in min pe mah se, a hnuah eng tin nge kan awm tak ang. Chenna in sak thuai a tul dawn a, nakin lawkah fur hun a ni dawn bawk sia” tiin a sawi zui bawk a ni.

Raltlante kir leh tur chungchangah Rakhine State-a Military council thupuangtu U Hla Thein, Mizzima Media-in a phone-a a zawh fonaah chhana a awm rih lo a ni.

Rakhine State-ah Military council sipaite leh Arakan Army (AA) te kum 2018 kum tawp atangin 2020 November thleng kum 2 dawn an inkahnaah tualchhung mi nuai 2 chuang an tlanchhia tawh a.

Kum 2020 November atang khan boruak a ziaawm deuh avangin raltlan thenkhatte an kir leh hlawm a.

Kum 2022 July thla atang khan AA leh Military council sipaite Rakhine State hmar lama thla 4 chhung an inbeihnaah raltlan an pun belh leh a, tun dinhmunah hian an chenna hmuna kir leh ngam lo raltlan mi sing 7 vel an awm tawh thu hriat a ni.

Share.

Leave A Reply

Exit mobile version