Rakhine State, Maungtaw-Angumaw (A Ngu Maw) Motor kawnga Rathedaung (Ya Tih Tawng) township, Chain Kha Lay (Chheing Kha Li) khaw kianga inkahna avangin in leh lo tlansan raltlan mi 500 chuang te chu emergency-a tanpui an ngaih thu Sedipin (Si Ti Pin) tlawmngai pawla thu neitu pakhat chuan heti hian a sawi.
“Nimina raltlan kan chhinchhiah dan chuan mi 300 an chuang tawh a. Vawiinah tanpui tura kan kalin mi 100 chuang an thlen belh leh. Ramhnuaiah mi 100 chuang an awm bawk a, an vai chuan mi 500 chuang an ni mai thei, a zat chiah kan hre thei mai lo. An hma lam hun an ngaihtuahawm khawp mai. Ei leh in silh leh fen, bung leh bel an harsa hle a. Chu mi avang chuan Rakhine mipui tlawmngai pawl ten tanpui turin kan ngen a che u” tiin.
Chain Kha Lay khaw kiangah hian August 13 khan an inkap nasa hle a. Military Council, opretion te, Bomb kam hmanga an beih avangin Military Council ten Motor kawng an khar a, mipui an check nasa hle a.
He opretion avang hian Chain Kha Lay, Done Pyaih (Dong Paih), Koe Tan Kauk (Ku Tan Kauh), Aung Ba La (Awng Ba Lah), Kone Tan (Kong Tan) khuaa tualchhung mipui te chu May Yu Taung (Me Yuh Tong) khaw kal kanin Mayu (Ma Yu) vaukam, ni chhuahna lamah an tlanchhia a ni.
Tuna Sedipin tlawmngai pawl te hian thilpek chi hrang hrang an dawn atangin an tanpui zel a. Raltlante an awm belh zel avangin nakin zelah harsatna an tawng zel theih dan chungchangah tlawmgngai pawla thuneitu chuan, “Tun dinhmuna kan tanpui theih te chu, ei in leh silhfen te a ni a. A hnu leh zelah harsatna namen lo an tawk thei a ni” tiin a sawi.
Tuna raltlan mi 500 chuang te hi Tan Chuang, Tayet Chaung, Aung Seik (Awng Saih) khua te chu Monastery-ah an awm khawm nual a. Awmna hmun hma leh ei in indaih lohna avangin Sedipin khua atang Motor-in an inthliar chhuah nual thu tualchhung mite hnen atanga hriat a ni.
