Rakhine State, Ann township, Thandwe (Ta Due) township leh Gwa (Guah) township-a thli hmanga power siam chhuahna (Wind turbine) hmun 3 buna tur chungchangah China company leh Naypyitaw khawpuia Military council Ministry of Electric Power, Ministry of Union Government Office te nen March 1 khan rem tihna thuthlung an ziah thu Military council Daily news Myanma Alinn chuan March 3 khan an tarlang a ni.
Ministry of Electric Power leh Primus Advanced Technologies Limited၊ Asia Ecoenergy Development Limited၊ Yunnan Machinery and Equipment Import and Export Co., Ltd. Te nena thuthlunnaah hian Ministry of Electric Power, Ministry of Union Government Office-a U Han Taung leh Myanmar China Ambassador H.E Mr. Chen Hai te an tel thu hriat a ni.
He project-ah hian Ann township-ah megawatt 150, Thandwe township-ah megawatt 110, Gwa township-ah megawatt 100, power pek chhuahna bun tum a ni a, kum 2025-ah bun zawh an beisei thu an thuchhuahah an tarlang a ni.
Chin hian ama hamthatna leh sum peipun nan Rakhine State-a a thiltih hi tualchhung mi ten an beisei vak loh thu Rakhine-a China project vilvengtu Kyaukphyu (Chauh Phiu) khua, Ko Tun Kyi chuan FRA Media-ah heti hian a hrilh a ni.
“China hian Rakhine State atangin India tuifinriat thleng pawh a tum hram a. China hian Rakhine chhim lamah project a siam nual tawh a, an thunun nual tawh bawk a ni. Heng project avang hian tualchhung mi tan hamthatna leh beisei tur eng mah a awm lo” tiin a sawi a ni.
Myanmar ram chhunga buaina a awm laia Military council ten China project a dawnsawn a angin ram kalsiam leh sumdawnnaah a hlauhthawnawm zawk a ni tiin a sawi zui bawk a ni.
Military council te chuan Rakhine State-a China-in Wind turbine project a bun tur chungchangah tualchhung mipui ten hmathatna leh hmasawnna tha tak awm tur angin an sawi ve thung a ni.