Rakhine State, Sittwe (Sit Tue) township-ah May 14 khan MOCHA cyclone thlipui avanga Mulsim awmna khuaah Rohingya mite tuifawnin a len hlum nual thu tualchhung mipuite leh Rohingya mipuiten Yangon Thit Khit Media an hrilh a.
May 14 chawhnu vela Sittwe khawpui atanga pal tlang MOCHA cyclone thlipui leh tuifawn nasat avangin Rohingya mite tuifawnin a len hlum thu tlawmngai pawla mi pakhat chuan heti hian a sawi.
“Sittwe vaukam TeChaung leh DaPaing velah thi an tam khawp mai, a zat chiah kan hre thei lo. Tuifawn invawrh chhovin tuipuiah a len lut hlawm a, thlipui hlau avanga tlanchhiate an la haw ngam rih lo” tiin a sawi a ni.
Sittwe khawpuiah Rohingya Muslim hmeichhia leh naupang 400 chuang tuifawnin a lem hlum tih thawm hriat a ni a, tlawmngai pawlten an puihna tur kawng chungchangah harsatna an tawh avangin an pui thei lova. An hriat theih chinah chuan SanPiah khuaah mi 50, BeDah khuaah mi 110. DaPaing khuaah mi 200 vel, BawDiPha(Aung Pin Le) khuaah mi 50 leh hmun dang atangin mi 50 tuipuiah a len bo thu hriat a ni bawk.
Rohingya chungchanga phusatu Ronny San Lun chuan raltlan camp hmun 5-ah mi 118 an thi a, chin hriat loh an awm nual tiin a sawi bawk a.
MOCHA cyclone thlipui avang hian mi 400 chuang an thih rin a ni a, raltlan camp hmun atangin mi 380 leh in 6 a chhe bawk a. MOCHA cyclone thlipui avanga tuifawn invawrh chho hi feet 30 vela sang te a ni a, a chhehvela mi te tuipuiah a hnuh luh thu Ronny San Lun chuan a sawi a ni.
MOCHA cyclone thlipui avanga Rohingya an thih tamna chhan hi vaukama awm raltlante a hun taka an inthliar chhuah loh vang nia hriat a ni bawk.
