Rakhine State leh Chin State-ah MOCHA Cyclone thlipui chakna a tham ral tawh avangin thlipui lakah an him tawh a ni tiin khawchhin thlirtuten chhinchhiahna a hringah an dah thu an thuchhuahah an tar lang a ni.
He an thuchhuah hi Meteorology and Hydrology Department-ten May 15 zing dar 5:30 vela an tehna atanga an puan a ni a.
MOCHA Cyclone thlipui hi May 14 zan khan Rakhine tlangdung atangin Chin State, Matupi khawpui a hrut hnuah thlipui tha chak tak Severe Cyclone Storm MOCHA atangin Cyclone Storm MOCHA thlipuiah insiamin a chakna a thlah dul tial tial thu Meteorology and Hydrology-ten an sawi a.
India Meteorology and Hydrology-ten an tar lan danin MOCHA Cyclone thlipui hi a chakna a tla hniam zel a, Myanmar lamah darkar khatah mel 40-50-a chakin a tawlh lut a, zawi zawiin thlipui chakna a tham ral ta a ni tiin a tar lang bawk a ni.
MOCHA Cyclone thlipui hian tun atanga darkar 6 hnuah a chakna a thlah dul zual zel anga, Sagaing region, Mandalat region hmar lam, Kachhin State leh Shan State hmar lamah a la tleh zel ang a, a hnuah thli pangngai angin a awm theih thu Meteorology and Hydrology-ten May 15 zing dar 7:00 khan an thuchhuahah an tar lang a ni.
Tunlai tak hian Myanmar ram chhung hmun hrang hrang Sagaing region, Mandalay region, Kachin State, Shan State leh Chin State, Naypyitaw, Bago region, Yangon region, Ayeyawadi region leh Rakhine region-ah te ruah sur leh tuilian a awm theih avangin mipuite in veng fimkhur turin an hriattir bawk a ni.
Tun tum MOCHA Cyclone thlipui avang hian hmun hrang hrangah chhiatna a awm nual a, chhiatna chungchangah NUG sorkar-ten an chhui mek thu May 14 zan khan an thuchhuah an tar lang a ni.
