February ni 7 atang khan Chin State chhim lam Kanpalet township-ah Miliatary Council te leh CDF-Kanpalet te inkahna boruakah ralthuam hman chungchanga an inthlauh avanga an in hnuhdawh rih thu PDF-Kanpalet ten an thuchhuahah an tar lang.
‘ CDF-Kanpalet atangin ralthuam leh silai mu indaih loh avangin tualchhung mipui te an him zawk nan tiin inkahna chungchangah ngawi kan dawh rih avangin Camp kan chhuahsan rih a ni’ tiin CDF-Kanpalet ten an thuchhuahah an tar lang.
March ni 11 khan Military Council mi 200 rual ten CDF-Kanpalet Camp hmunpui tinzawna an kal laiin CDF-Kanpalet te nen YeLaung Pan khaw luh dawn, PanTaung Kyaw khuaah in tawkin an inkap chiam a, Military Council lam mi 3 an thih thu hriat a ni.
Chumi hnu March ni 13-ah khan NgonLaung khaw hmar lam, AmPong khaw lu-a Military Council te inzarpharh chu CDF-Kanpalet, CDF- Mindat, Yaw PDF, The Youth Force te leh Saw=PDF ten tlang karah zawngin an kap a, Military Council lam mi 2 an kap hlum a. March ni 14 pawh khan intawnchilha inkahnaah Military Council lam mi eng zat nge thi leh hliam an awm thu hriat a nih loh thu CDF-Kanpalet ten an thuchhuahah an tar lang.
CDF-Kanpalet, CDF-Mindat, Yaw PDF The Youth Force leh Saw-PDF te leh Military Council te chu March ni 15, zing dar 8:00 atanga tlai lam dar 3:00 thleng, DaMah Ta khaw hluiah an inkap chiam a, CDF-Kanpalet sipai mi 1 a thi a, mi 2 an hliam thu hriat a ni.
A hnua hriat leh dan chuan March ni 15-a inkahnaah Military Council ten ralthuam lian an chelek chiam a, kum 40 mi, pa pakhat ralthuam lianin a fuh avanga a boral thu tualchhung mi ten an sawi thu hriat a ni.
Tun dinhmunah rih chuan Kanpalet township chhunga mi 1200 chuang chenna DaMah Ta, SanEiang Nuu Khi Daw Mah khuaa mi te ram hnuaiah an tlanchhiat nual thu hriat a ni.
Kanpalet township-ah hian Military Council ten a khawpuma an luhchilh avangin ram pawn leh ram chhung mite hnenah ralthuam leh a tul tul tanpui turin CDF-Kanpalet ten an ngen.
