Military council ten thuneihna an lak kum 2 tlin dawn hnaihah CDF-Asho Battalion chuan a vawi 1-na training an zo tawh a, January 21, 2023 khan CDF-Asho Battalion an din a ni.
An din zawh ni 5 hnuah January 26 khan Magwe (Ma Gui) region, Ngaphe township, Padan khawpui Gokgyi (Goh Chi) khuaa Gohkyi police station, Lockup leh Check gate an kap nghal a, station-a an ralthuam dahna hmun pawh vawi 2 an bomb tawh a ni.
“Ral beih dawn chuan sum leh pai leh ralthuam a tul a, kan pawl dinna a la rei si lo. Eng pawlah mah zawm kan la nei lova mipui thawh khawm lah a la tlem rih sia” tiin CDF-Asho deputy company commander chuan a sawi.
February 3 pawh khan Rakhine State, Western region military headquarters, Am township atanga Magwe region, Ngaphe khua pan mek Military council motor 16 rual te, Am khua leh Padan khaw motor kawngpui No.9 bulah CDF-Asho Battalion ten an bomb bawk a ni.
“Chawhmeh tur hi ramhnuaiah kan zawng chawp thin a, sa tel lo pawhin an ei thei tho a, a khat tawka sa hmehtir erawh kan duh khawp mai. Kan pawl dinna a la rei bawk si lo, theihtawpin kan inren bawk a, mipuite min puihna chungah kan lawm khawp mai” tiin CDF-Asho, ei in lam buaipuitu thuneitu pakhat chuan a sawi.
February 9 pawh khan CDF-Asho, a vawi 2-na Training pawh hlawhtling taka an zawh fel thu hriat a ni.
Asho hnam zingah hian Asho Chin Defense Force (ACDF) leh Chin Defense Force-Asho tiin pawl 2 a ding ve a. Asho Chin Defense Force (ACDF) pawl te hi kum 2021 November 26 khan an din thu hriat a ni bawk.
