Myanmar-ah kum 2021 February 1, atang khan Military council-ten thuneihna an lak hnu hian ram chhung thalai rualten dodal nan tiin kawng an zawh mup mup laiin Military council sipaiten ralthuam hmangin mipui kawngzawh te an um darh thin a.
Heng avang hian thalai rual thenkhatten tualchher silai te tuk chawpa Military council sipaite an hmachhawnna hi kum 2 leh a chanve a lo ni ta der mai. Chung zinga Pawl 10 zirlai Daniel Thang, CNA-a a inpek dan chu Khonumthung Media-in an interview-na i lo ngaithla ang u.
Zawhna: I zirna chanchin leh boruak tawn dan tlem min hrilh thei ang em?
Chhanna: Ka lawm e, Chin State, Falam township khaw pakhata piang leh seilian ka ni a. Pawl 10 zirin Sagaing region, Kalaymyo Boarding school-a ka lut ve a. Kan unau zinga a upa ber niin kum 18 ka chuang ve tawh a. Military council-ten thuneihna an lak hma khan Kalaymyo-ah School ka zawm ve a, Military council-ten thuneihna an lak hnu khan school an khar vek avangin Chin Hill, thingtlangah kan awm ta mai mai a, hnathawh tur awm mumal lovin ka pi leh pu te hnenah ka awm a, Military council-ten thuneihna an lak vang leh Covid-19 hri leng avangin school kan chhunzawm thei tawh lo a ni.
