Silai 7 Atanga Bul Intana – Sipai 7000 Zet Nei Tawh KNDF!

0

Tunlai Che Guevara Pawlte:

Myanmar spring revolution-in thuneihna paihthlak tuma hma a lakna kawng hrang hrangah hmun tina PDF ten mahni bi tum theuh hlenin Defensive D-Day game an khel mek a. Attacking D-Day game pawh tun atanga rei vak lovah a rawn thleng chawpchilh mai thei reng a. Chung PDF thalai rual pawl hrang hrang zinga thang duang chak leh neksawrna kara hmasawn chak ber chu Karenni National Defense Froce (KNDF) te hi an ni hial awm e. Tun tum chu an chanchin hi tlem han sawi kai lawk ila.

Kaya state, a hmuna chengten Karenni state an tih deuh kher, hi Naypyidaw, Shan Tlang dung, Pago tlang dung leh Southern Command Headquarters awmna te nena inzawm kual vek avangin, ralrelna hmun pawimawh tak a ni a.

February ni 1-a sipaiin thuneihna a pawng lak hnua tharum hmanga sipai dodaltute an hnawhdark takah chuan Karenni state chhunga thalai rualten May ni 19 khan Karenni National Defense Force (KNDF) chu an din ta a. Chutih lai chuan ralthuam lamah Tukuli, Ulhbun leh Point 22 kawlin, sipai hmachhawn tak tak nan M-16 rifle 7 an nei bawk a; chuta tanga bul tan an ni ti mai ang; tun lai Che Guevara (Argentine, Cuba tana ralthuam hmanga zalenna sual chhuaktu, Guerrilla leader) pawlte pawh an tih theih hial awm e.

Tichuan, ralthuam lamah pachhe hle mah se, KNDF ten military training-na hun leh ralthuam tha lakkhawmna hun tur pawh ngaihtuah lovin, an neih ang ang lek chhuakin rilru huai leh pa takin May thla ni 21 (pawl din atanga ni 2)-ah Military council sipaite chu ဒေါင်းငံ့ခါး hmunah hmachhawnin an bi tum nghal chat a. An rilru a paukauhin an tum ruh bawk a, inbeihna hmasa berah sipai 60 chuang an dah tha thei nghal mai a. Chu mi piaha an hlawhtlinna chu, an beisei ngam loh, chu inkahna atangin 60 mm – 1, RPG 1, M-79 1 leh silai te chi 60 chuang an hui khawm a. Chu mi tuma an beih sipaite chu Myanmar sipai zinga ro thap leh tawrawt bera an sawi thin, hmunbuai leh ral rama an dah thin ni bawk Batallion 66 pawlte an la ni zui a.

KNDF te hian tun thlengin rualthuam lamah an la indaih lo hle a, mahse indaih hun nghak lovin, an pen chhuak reng a, chan loh lam khan atangin ralthuam an phu leh nghek zel mai a ni. Hman ni lawka din KNDF hian tunah Batallion 19 nei tawhin force 7000 chuang an awm tawh a. Military training satliah bakah Commando Sniper training chhuak tawhte pawh an awm nual tawh a. Mipui leh tlawmngai pawlte tanpuina pawh an dawng tha tih chu hai rual a ni lo va; tun hnaia an uniform thar tha tak tak inbel leh an ralthuam kente en pawhin sorkar sipaite ai pawhin an changkang titih reng tawh a ni.

Military council sipaite harsatna leh buaina chawhchhuahna karah mipuite venghim tur leh state chhunga dan leh thupek kenkawh theih nan indo lam ngawr ngawr ni lovin, khaw hrang hrangah mahnia inrelbawl theih nan police department te an din a. Chutianga ti thei awm chhun pawh an ni hial awm e.

Kaya (Karenni) state-ah May thla atanga inkahna hmun hrang hranga chhuakah firfiak sipai 500 chuang an thi tawh a, tam tak an inhliam a. Military council sipai batallion pahnih vel ngawt chu an vaw chhe tawh tihna a ni ber a. Chutih laiin KNDF lamah pawh sipai 20-in mipui zalen nan an nunna an hlan ve bawk a ni.

Kaya state hi Military council sipaiten an beih tirh khan an sangawi zawnpui Shan state lama PNO (Pa-O National Army) te pawh an tel ve hman a. Mahse, KNDF lam chet dan chu PNO hruaitu U Aung Kham Hti sipaiten an dawl zo lo a ni ber ang, an inthiarfihlim nghal thuai a.

KNDF phena awm leh back up-tu ber chu KNPP (Karenni National Progressive Party – Karenni Army) te an ni a. KNPP/KA ten training an lo pek bakah ral hmatawngah kaihruaiin a takin zirtirna an pe bawk a. KA pawh hian Spring revolution hi mipui bul tan a nih angin, mipui kutah ralthuam a awm tur a ni tih policy an nei tlat a, a tawp thlenga mipui nen tangruala bei turin thu a lo tiam tawh bawk a ni.

Atir lam chuan, Karen state-a military council sipaiten ralthuam hrawl tak tak laipui ang chi hma theh a, PDF te chu vau zam mai theihah an ngai a, hmun hrang hrangah laipui chu an surtir thin a ni. Mahse, an lo ngaihdan angin thil a thleng dik thei lova, a thi tam zawk an nih zel tho avangin, an rilru a chi-ai tan a, indona hmachhawn aiin thlan chhiat tumna rilru an nei lian tawh zawk a. Tum khat phei chu, tun hnai khan firfiak sipaiten PDF te nena inkap ang lantir tur leh PDF tan hmun la anga lantir nan PDF te chu biain an ralthuam hlui leh hman tlak lohte lo dah turin inremsiamna neihpui te an tum hial a. A chhan chu inkah a, thih an hlau tlat tawh a ni.

Chuvangin, khawi hmuna awm PDF, CDF, CNDF leh mipui sipaiten kan chakna chu ralthuam neih that leh ralrel thiamah ringawt ni lovin, Rilru lama huaisenna leh inpekna tak tak zawk a nihzia hre reng turin, Rifel 7 leka bul tan, thla 3/4 vel leka sipai ralthuam keng 7000 chuang nei thei, tunlai Che Guevara Pawlte tih hiala mawi Karenni National Defense Force (KNDF) pawl hi i ngaihtuah chhuak thin ang u.

Share.

Leave A Reply

Exit mobile version