India-Myanmar ramri, Chin state Rihkhawdar khuaa military council sipaite awmna camp chu CDF-Hualngoram pawlin July ni 25 leh ni 26, ni 2 chhung an beih thu hriat a ni.
CDF-Hualngoram pawl chuan khaw chhung operation lam kalpuiin Rihkhawdar khuaa sipai camp chu an bei tan nghal a, military council-in dik lo taka political prisoner a tihhlumte tana thungrulhna a nih thu CDF-Hualngoram chuan thuchhuah a siam a ni.
A ni khatna inkahna chu minute 40 vela rei niin, a ni 2-na chu minute 20 vel lek niin, chu inkahnaah chuan CDF-Hualngoram pawlin silai lian leh te hmangin an bei a, mahse sipai lama thi leh hliam awm zat tak chu hriat a ni lo a. CDF-Hualngoram pawl chu tumah thi leh hliam awm lovin, an tawlhsawn leh theih thu hriat a ni bawk.
