Bangladesh atanga nikum December 1 ni-a chhuak Indonesia pan mek Rohingya raltlan mi 180 chuanna Lawng pakhat chu chin hriat lova a bo thu hriat a ni a. Bangladesh raltlan camp-ah hian suamhmangte an chet thin a, naupang leh nu thenkhatten an hlauh avangin an tlan chhuah thin thu hriat a ni a. Heng tlan chhuak nu-naute AP news-in a kawmnaah kum rei tak an chhung hmun tawh lo, hmuh beiseia kal chhuak te an nih thu hriat a ni a.
Nikum pawh khan Rohingya raltlan mi 3500 chuang vel Bengal tupuiah leh Adaman tuipui an pal tlang thu UNO-ten an sawi a. Kum 2014 atanga chhut chuan Rohingya mite tuipuia bo ta te hi an tam tawh ngawt ang tiin an sawi a.
Thla hmasa lawk khan heng Rohingya raltlante chuanna Lawng awmna an hriat hnuah tanpui turin UN, High Commissioner office an hriattir a, hma an lak mai loh thu hriat a ni a. Tun hma kha chuan tuipui kama ram awmten tuipuia harsatna nei an awm chuan an zawng thin a, tun dinhmunah erawh chuan tuipuia an tanpuite hi tuipuiah bawk an kal chhunzawmtir thu hriat a ni bawk.
Tun khawhnuah chuan tuipuia zawn hna an bei meuh tawh loh thu Rohingya mite ngaihven thin Rakhine Planning Team, Director Chris Lewa chuan a sawi a. A vanneite chuan sangha man lawngte tawk palhin Indonesia-ah an thlen thin a. Vietnam khawnvarpui phur lawng pakhat chuan Myanmar lamah an thawn kir leh thu AP news chuan a tar lang bawk a ni.
