Russia Defense Deputy-Minister Colonel Colonel General Alexandar V. Fomin chu March ni 27 atanga Myanmar Tatmadaw Day lawmmnaa tel turin March ni 25 atanga ni 27 thleng Naypyidaw-a a awm tur thu sipai lam source-in a tarlang.
March ni 25-ah Naypyidaw-ah a thleng ang a, March ni 27 tlai lamah a haw leh dawn a. Min Aung Hlaia sawm niin, Tatmadaw Day a hman pui bakah ralthuam chungchang an sawiho tel nghal dawn tih hriat a ni.
Ni kum March ni 27 pawh khan firfiak sipaiho ni chu Russia Defense Deputy Minister-in a hmanpui tawh a, Min Aung Hlaian kawngzawh mipuiho hmanrua tiin sairawkherh leh petrol bottle te chu a lo entir bawk a ni.
Russia Deputy Defense Minister Colonel General Alexandar V. Fomin chu Min Aung Hlai nen an inkawmngeih ang reng hle a, mahse ani chu Russia rama politics leh military lama pawimawhna nei sang vak lo, sipai lam hruaitu pakhat ve mai a ni.
Tunah hian Naypyidaw-ah Russia bungraw phur thlawhna vawi engemaw zat a tum tawh a, military council-in Russia nen sipai lama inzawmna tha tak neih chho a tum zel tih hriat a ni.
