Sagaing reigon, Kani, Yinmarbin, Pale, Debeyin, Tabayin, Kawlin, Meuw township-a PDF te chu military training pek vek an nih thu leh PDf te tanpuina pek an nih chungchangah military council sipaiin van lam boruak leh lei lam atanga tangkawpa an beih rawn avangin, Sagaing region chhungah February thla chhungin civil mi 47 vel an thih thu RFA-in a tarlang a.
A tam zawk chu an thih hmaa nghaisak tawk an ni a, thenkaht chu nung chunga hal hlum leh hmeichhiate chu pawngsual hnua thahte an nih thu tualchhung miten an sawi a ni.
February ni 10 khan Sagaing region, Pale twonship, Muhton khuaa thing la tura kal mi naupang kum 16 leh tualchhung mi pathumte chu sipaiin an thah rikngawt thu an chhungten RFA heti hian an hrilh a.
“February ni 11 khan kan tupa chu tlang ram lamah thing la turin an kal a, sipai operation nei tawkin an lo that a, kan tupa chu kum 16 mi chauh a la ni. A khawngaihthlak tak zet a, a ruang hmututen an sawi danin tuikhuah kamah a taka hliam hnuhma awm nuaih nen thia hmuh a ni a. Tunah chuan kan fanaute kan chan tawh a, kan chenna leh kahwsakna zawng zawng hal chhiat vek a ni tawh bawk a, a harsa a ni. Kan tan vanpui chim ang a ni a. Mahni khua in leh lo pawh kan nei tawh lo. Kan khua chu kan bel ngam tawh lova, ramhnuai pilril zawka awm zel a ngai a. Engmah neih kan nei tawh lo a ni,” tiin a sawi.
Anni chuan an chhungte that an nih hmain nghaisak an tawk vek a, chu mi hnuah silai kaw hmawra an lu tina kah an nih thu leh hliam nasa an tawrh vek thu an sawi tel bawk a ni.
Sipaiin thuneihna a pawng lak hnu, kum khat chhungin, pawisawi lo mipui 1604 an thi tawh a, mi 12534 man tawka an awm mek thu political prisoner tanpuitu pawl AAPP lamin March ni 4 khan thuchhuah an siam a ni.
