Sagaing rengion, Sagaing township-ah Military council sipai ten operation an neih avangin tualchhung mi 9000 an tlanchhiat thu tualchhung mi ten Yangon Khit Thit Media an hrilh.
Military council sipai ten kum 2022 December 10 khan tum khat, December 27,28 khan tum khat, kumin January 22 khan tum khat operation an beih avangin Sagaing township-a Tong Lint khua, Kaing Pin khua, Kin Taw khua, Le Pe Taw khua, Min Se khua, Uh Yin khua leh Myit Ta khuaa chhungkaw 1050-a mi 8750 chuang hmun him lamah an tlanchhiat thu hriat a ni.
“Ayeyawadi (Ai Raw Di) tuipui tluan an khuap vek a, Mandalay region lam an dang chat ang a ni. Tuna Sagaing township an operation-na hi tum 3-na a ni” tiin PDF sipai pakhat chuan a sawi.
Military council sipai ten kum 2022 December 10 khan Sagaing township, Min Se khuaah In pakhat, Letpantaw khuaah In pakhat, Letpantaw Monastry hung chhunga Building 2 an hal chhia a. A tum 2-na atan December 27,28 khan Min Se khuaah In 78, Tong Lint khuaah In 16 an hal chhiat thu hriat a ni.
Heng bakah hian Min Se khuaa kum upa pakhat Military council sipai ten an that a, raltlan zinga mipa 3 khaw vawtin a hmet hlum bawk. January 22 khan Tong Lint khuaah In pakhat an hal a, Ong Taw khua tlang ruamah Military council sipaite an luh leh thu hriat a ni.
Tun dinhmunah Military council sipai ten operation an beih mek avangin tualchhung mipui te ramhnuaiah an tlanchhiat nual thu hriat a ni bawk.
