Sipaiin thuneihna an pawng lak hnua PDF te tamna leh chakna ber hmun chu Sagaing region, Maguei region, Chin state leh Kaya state a ni a. Kaya state nena inri Shan state-ah chuan PDF chetlakna a na lo hle thung a ni.
Chin state chu Sagaing leh Maguei nena inri a ni a, Sagaing pawh hmar lamah Kachin nen inri a ni ve bawk a. Sipai lam chuan Chin leh Sagaing chu hmer kawpin Northwest Command Headquarters hnuaiah an dah a. Sagaing region hi ram zau tak a ni a, chutah Chin state nena kawp a nih zui takah chuan sipai lam bial pawh a zau phah hle a. Ram bial a zauh ang bawkin People Defense Force (PDF) te an tamin an chak tha hle a, a bikin Chin National Front (CNF) rinchhanin, Chinland Defense Force, Kalay PDF, Monywa, Minmu, Chaung Oo PDF an awm bawk a. Chutih rualin Sagaing hmar lamah KIA tanpuina leh kaihhruaina dawngin Kawlin, Wuntu, Hti Jaint, Pin-Le-Pu PDF thenkhat chu an che na thei hle bawk a ni.
Military council sipai lam han enin Sagaing region tan battalion 33, operations command headquarters 10, Regional Command headquarters (Kalay) te chauh awmin a tir lamah force awmsa nena control tumin bei mah se, hun a lo rei a, inzat lohna a lang chho ta zel a ni. Regional Commander Chief Police Than Hlai bakah Special Task Force Commander 1, Lieutenant General Tay Za Kyaw chu Sagaing region enkawltir a ni bawk a.
Inkahna lam han thlir ila, Sagaing region-a sipai awm, indaih loh avangin, Paletwa leh Rakhine lama brigade 55 hnuaia battalion thenkhat chu Chin hill leh Kalay lam thlengin an ko thla a, PDF te chu thunnun tumin rawlralin an bei a. Chuvangin hetia han thlir mai pawhin sipai chakna hmanga Sagaing chhunga PDF te thunun tur chuan a harsa tawh hle tih a hmuh theih a. A chhan chu Chin state nena inrina hmuna awm PDF te chu CNF hnen atanga military training zo deuh vek tawh an ni a, an ralthuam – silai kente pawh Tukuli leh ulhbun satliah ni tawh lovin, rifle, AK leh M16 te a ni tawh hlawm a; tunah phei chuan indo dan an hre thiam tawh a, tawn hriat an nei nual tawh bawk a. Kawlin, Wintu, Pin-le-Bu, Hthi Jaint, Kata lamah PDF te chu KIA lam nena thawkho tih takah hmun tam tak chu an thuhnuaiah an leh dah tawh zawk a ni.
Monywa atanga Sagaing thlengin lei lama inkal pawhna chu bomb a ni deuh reng a, chu lai hmun zaa 70% chu PDF lamin an control a tih theih a. Sipai lamin operation chu thuang thuma kal pui tum pawh ni se, a ngaihna a awm tawh lo a, brigade danga sipaiho han lak pen leh pawh tum se, hmun dangah an indaih bik tawh si lo a. An lak belh loh erawh zawngin Than Hlai leh Tay Za Kaw te chu a nung chunga man tawk thei dinhmunah an awm reng mai tawh a. Boruak lama tanpuina dil mai a ngai ta thin a ni a. Chuvangin, enge thleng zel dawn tih chu mipui lamin i lo thlir zel phawt ang u.
