Myanmar ramah Febuary ni 1 atangin sipaiin thuneihna an lak hnuah Spring Revolution tan a ni a, chutah chuan sipai thuneihna dodaltute chu sipai lamin an kap hlum a, tan in lamah an khung bawk a. Chung zingah Myanmar spring revolution report la thin, Journalist tam tak chu tan ina khung an ni a. Journalist thenkhat chu revolution lamah intat lutin, an kawlawm lekna kutin Rifle silai an hum a, sipai thuneihna chu an do let tan a. Chung zingah chuan Chin thalai, journalist Salai Benezar pawh a tel ve a ni.
Salai Benezar chu main stream media Eleven, DVB chanchinbu lama a lo thawh tawh bakah, Chin chanchinbu The Chinland Post, Chin World leh Khonumthung media lamah pawh reporter hna a lo thawk tawh bawk a. Spring revolution tan hnuah journalist nihna kalsanin Chin National Front (CNF/CNA) ralthuam keng pawlah a lut a.
Engvanga journalist hna kalsana ralthuam kengna lam tluang a zawh tak mai, a hma lam hun thlir dante chu eng nge ni ve ta ang tih chungchangah Salai Benezar chu Khonumthung Media-in heti hian interview a nei a ni.
Zawhna: Journalist Reporter nihna kalsana ralthuam kenna lam i thlan chhan min hrilh thei em?
Chhanna: A chhan ber chu thuneihna lak a nih atangin chanchin thar kan la reng a, chutianga chanchin thar (news) kan dap kualna kawngah, a tir atanga he sipai thuneitute duh lohna nei sa ka lo nih angin, reporter hna leh news zawnna lama kawngzawhte han hmuh phei chuan ka tuar thei tawh lo. Keimah ngei tel duhna a rawn awm zel a. Mahse, a tir lamah chuan reporter nihna lam atang pawhin thawh theih a ni tho alawm tiin, media lamah ka thawk chhunzawm zel a. Mahse, a hnuah he revolution-ah mahni ngei tel chakna, sipai sorkar, military council do let duhna a len tak em avangin, media khawvel atanga inhnukdawkin he Revolution-ah hian ka tel ta a ni.
Zawhna: Revolution-a i telnaah hian inchhir chang I nei tawh em?
Chhanna: Inchhirna chu ka la nei lo. A chhan chu keimah ngeiin revolution-a tel chakna kan neih tlat avangin, media hna thawh chu ngaina hle mah ila, he sipai sorkar do let chakna pakhat chiah kan neih avangin, inchhirna ka la nei lo a ni.
Zawhna: Revolution-ah i lut tawh a, I hmalam hun atan eng beiseina nge i neih?
Chhanna: He revolution-a ka luh hnu hi chuan hma lam hun beiseina e mem ka nei lo. A chhan chu englai pawha thi thei reng ka ni a. Engemaw thleng thei reng a ni bawk a. Chuvangin, hma lam hun ngaihtuahna em em ka nei lo. Ka tum ber zawk chu he sipai sorkar, military council do let a, Chin mi ka nih anga Chin mipuite tan dam chhunga an rawng bawlsak hi ka thutlukna siam a ni.
Zawhna: He revolution hi awm ta lo se, tunah engtiang dinhmunah nge i awm ang?
Chhanna: Journalist ka nih angin, media hna thawh zawm zel chu ka tum ber a ni a. Theih te a nih chuan, Chin media tan mahnia media pawl din theih te ka lo rilruk a. Mahse, tunah chuan Revolution lamah ka lut tawh a, tun hmaa ka lo tum leh suangtuahna zawng zawng chu a awm tawh lo.
Zawhna: Tuna Revolution-a i luh takah hian thil chan lian tak takte i nei em?
Chhanna: Thil chan lian tak han tih chuan a bikin, ka chhungte pawhin rem an ti lova, tu nu leh pa, chhungte mahin, mahni thisen zawmpuite hetianga awm chu an duhthusam a ni lo a. Thil dang channa lian tham chu ka Professional hna pakhat media khawvel ka chhuahsan hi a ni a, Revolution-a ka luh takah chuan chu chu ka thil chan lian ber a ni.
Zawhna: Ralthuam keng pawla i luh takah chuan training neihna velah harsatnate i tawk em?
Chhanna: Harsatna lamah chuan kei chu naupan tet atangin infiamna lam hi ka ti ngai lo a. Exercise pawh la ngai lo ka nih angin, he revolution-ah luta training neihnaa tlan leh exer’ lak vel chu a hahthlak hle a. Mahse, keimah ngeiin thutlukna ka lo siam tawh a nih angin, tuar tang tangin ka bei ve zel a ni.
Zawhna: Chung hunah te chuan in lam ngaih changte i nei em?
Chhanna: Ka luh atangin harsatna a awm dawn tih ka hre sa a. Chuvangin, harsatna eng pawh lo thleng se, beidawna leh inchhirna ang chi engmah kan nei lo.
Zawhna: Nangmah anga Revolution-a lut journalist-te, Civil society lama mite pawh an awm ang a, chung mite tan engti zawngin nge fuihna i pek duh?
Chhanna: Keini revolution hna kan thawk tih chu sipaiin thuneihna an lak tumahin sipai thuneihna an duh loh avanga revolution indonaa suang lut tam tak an awm a. Chutiang thil a thlen chu tun hma atanga beisei lawk an tam lo hle a. Kan thil tawnte chu khirh tak takte a ni ang, mahse engtia pawha harsa leh khirh, beidawnna awm thei pawh ni se, kan tum berk an theihnghilh tur a ni lo. Kan tum ber chu sipai thuneihna paihthlak, nakina Federal Union din a ni a, kan nunna hial pawh pek a ni ang tia rawn lut an tam hle a. Chuvangin, eng harsatna pawh tawk ila, lungrual taka kan thawkho zel a nih chuan tih theih loh hi a awm lo a. Eng harsatna pawh nise, dawhtheih a ngai a, kan tum ram ngaihtuah reng chunga revolution bei zel turin ka fuih duh a ni.
Zawhna: He revolution zawh hnuah enge tih zawm zel i tum, dream i nei em?
Chhanna: Revolution a lo zo a nih pawhin kei chuan tum leh dream em em pawh ka nei lo. Ka ngaihdan chuan he revolution tana ka inpekna hi ka dam chhung inpekna a ni tawh a. Chuvangin, revolution a zo ta a nih pawhin, Chin hnam (nationalism) lam, a tulna apianga thawh chhunzawm zel ka rilruk a ni.
