Thuneihna latu Min Aung Hlai leh a military council sipaite chu Chin hnam suat mang tura indona a kalpui mek niin National Unity Government hnuaia Federal Union Affairs Minister Dr. Lian Hmung Sakhong chuan October ni 30 khan video address hmangin a sawi chhuak a.
“Tunah hian Min Aung Hlai leh a military council sipaiten Chin hnam suat mang tumna indona nasa takin an kalpui mek a. October ni 29 atangin Min Aung Hlai leh military council ten kan Chin state Thantlang khua chu an hal chhia a. Min Aung Hlai-a military council ten kan Chin hnam chungah mihring suat mang tumna indona chu April, May thla atang tawh khan bul an lo tan tawh a ni. Kan hriat theuh angin, kan Chin state chhim lam Minat khua chu tuna Thantlang khua hal chhiat a nih angin indona nasat taka chhawk chhuakin a lo tihchhe tawh a ni.”
Thuneihna laktu Min Aung Hlai hian tuna a thiltih mek chu tawpsan a, mipui hnenah a rang thei ang berin ngaihdam dil a, thuneihna hlan leh nghal turin NUG Minister Dr. Lian Hmung Sakhong chuan heti hian a sawi bawk a ni.
“Min Aung Hlai hian Mipui hremna pek a tawrh hmain, khawvel hremna pek a tawrh hma leh history hremna pek a tawrh hma ngeia a tih theih chu pakhat chauh a awm a ni. Chu chu thuneihna a pawng lak hi a dik lo a ni tia mipui hnena ngaihdam dil a ni. Mipui hnenah ngaihdam dilin mipui thlantlin sorkar hnenah a rang thei ang bera thuneihna pek let leh a ni bawk a. Chuvangin, Min Aung Hlai nena thawkho General-te ka fuih tel duh chu vawiin niah hian Min Aung Hlaia kawng dik lo hi zui suh u, Min Aung Hlaia thupek hi zawm tawh suh a, Min Aung Hlaia suahsual pawikhaihna te tihtawp ni tawh se, mipui lama silai kaw hmawr dah chu Min Aung Hlaia lamah tin zawkin mipui nen i tangho ang u tih hi kan sawi duh a ni.”
Thuneihna latu military council hotu ni bawk Min Aung Hlai-a sipaite chu Chin state-ah April thla leh March thla atang khan operation nasa taka nei chhoin, Kristian biak in telin mihring chenna inte chu meiin an hal a, Chin mipui sing tel chu raltlanin an awm phah a ni.
October ni 19 pawh khan Thantlang khua chu thuneihna latu military council sipaiten a vawi hnih nan an hal leh a, biak in 2 telin chenna in 164 a kang rel vek bawk a.
Chin state Thantlang khuaa military council sipaite civil mite chenna an beih dan leh an halna chu US lamin sawiselin an dem hle a, Myanmar sipaite hnena ralthuam hralhna titawp tur leh human rights bawhchhiatnate chu khawvel ram hrang hrangin hmanhmawh taka hma an lak a ngaih thu Department of US foreign Ministry chuan October ni 31 khan thuchhuah a siam a ni.
