Sagaing region, Salingyi township chhunga sipai company leh China Wanpound-Yansi Company nena thawhhona copper project zawng zawng titawp tur leh tih tawp a nih loh chuan ralthuam hmanga beih a nih tur thu leh hna thawktute zawng zawng chu May ni 5 ral hmaa CDM zawm vek turin Alliance (ralthuam keng pawl) 16-in vaukhanna thu an chhuah a ni.
Salin-Gyi Yinmapyin PDF pawlin SalinGyi township chhunga Copper project-a hnathawk staff te chu May ni 5 thleng hun tawpa neia CDM zawm tur leh sipai leh China thawhduhna copper project tihtawp a nih loh chuan tualchhung PDF pawlin an khawih chhiat vek tur thu an sawi bawk a.
Chu vaukhanna thuah chuan tun hi ram tana sipai thuneihna a zung chawpa phawi chhuak vek tura mipuiin ralthuam kengin, indona mual chu SalinGyi township chhung thlenga zauh a nih dawn thu leh Copper project chu tualchhung mite leh dikna diltu force tam takten kum rei tak chhunga an lo buaipui tawh thil a nih thu tarlang a ni a.
Tual chhunga copper project awm hian sipai thuneitute chiah a vulh lian a, ram leh tualchhung mite hmasawnna a thlen lova, sipai thuneitute sum hnar leh mi hausa tawntawte sum thunna project mai a nih avangin, dodal zel tur a nih thu pawh tarlan a ni bawk.
Chutih rualin Alliance ralthuam keng pawl 16 te chuan sipaite thuneihna paih thlak tum mek laia sipaiho thawhpuitu China company Wanpound leh Yansi company ten copper project an la kalpui reng chu chhan awm lo leh revolution hun laia tih loh tawp tur a nih angin, tihtawp lailawk a ngaih thu leh, eng pawl, tu pawhin chhunzawm zel an tum a nih chuan thenfai hna thawh zel a ni ang a. May ni 5 ral hma ngeia hnathawkte CDM zawm tur leh tualchhung nu leh pate pawhin sipaite hnena sum lut tur dang bet zel tura ngenna thuchhuah pawh tarlan tel a ni.
