Yangon, Taihgyi based LIB 704-a awm arsi pathum bel, Captain rank, ruihhlo khawih mek, CDM zawm tak sipai Saw Maung Nyi Lwin-a inpuanna atanga hriat a ni.
Ani chuan Kani-Buhtalin operation atanga Chauh-Long mipui venghimtu pawl (KLG PDF) nen indawr fuhin June ni 6, zing lam dar 7 velah mipui lamah a inpe ta a.
Ani chuan, “Operation neih laiin phone a hman theih miah lo a. Ei tur pawh hnianghnar taka pek kan ni lo. Khaw pakhat kan luhin mipui thil neih kan dap kual a, kan ei chawp zel a ni. Kan operation neihnaah phei chuan captain (arsi pathum bel) thlengin ruihhlo kan ti vek a. Captain berin khaw chhung hal tura min tih chuan kan hal mai zel a ni,” tiin a sawi.
Chu bakah sipai Saw Maung Nyi Lwin chu sipaia a tanna kum 9 a ni tawh a, a chhungte hnena haw lohna pawh kum 7 zet a ni tawh. Ani chuan, “Kan nu leh pate kum upa, tar an nih tawh pawha mahni in haw thei lo dinhmunah kan awm reng mai a ni,” tiin a sawi.
Ani chu sipai nih chak avanga lut a ni naa, tunah chuan mipui chenna in hal chhiatsak a ngaih tak avangin, KLG PDF te nen inbe pawpin CDM a zawm tih hriat a ni a.
May thla chhung vel pawh khan Yangon-Mandalay highway-ah LIB 704-a Captain Myo Ko Ko chu ruihhlo avanga chiang lovin, pension tawh Captain Taw-Taa-Lin chu a lo kap hlum tawh bawk a ni.
