Myanmar ramah February ni 1 khan sipaiten mipui thuneih an pawng lak tih kan hriat vek laiin, chu mi hmaa Min Aung Hlai-an sipaiho zingah thuneihna a lak hmasak thu chu kan hre lo pawh a ni mai thei e.
Sipai General hovin thuneihna an lak dawn apianga an tih ngei ngei ngai chu sipaiho zinga thuneihna lak hmasak a ni. Sipai hotu zingah an mahni erpha thei leh dodal thei turte chu an nihna, hna chelh leh awmna hmun te siksawiin an thuneihna nghet zel turin thurual pui leh lam tang an insiam phawt thin a.
Chutiang bawkin General Than Shwe leh General hlui dangte pawhin an lo ti tawh a, tun tumah pawh Sr. Gen. Ming Aung hlai hian Then Shwe leh General dangte be rawn leh lamtangah la siam rengin sipai thuneihna leh mipui thuneihna a la kawp thei a ni.
Mahse, Gen. Ming Aung Hlai-a thuneihna lak chu thla 6 chuang tawh mah se, tun thlengin a hlawhtling a la tih theih loh a, chutih rualin sipai (military) pumpui hi a keh chhe dawn niin mithiamte chuan an hmu tlang tawh a ni. A chhan ni ber lang thil 6-te chu:-
- Sipai chhungkuaah Min Aung Hlaia kaihhruaina solid tawk lo leh mi hnem lutuk anga hmuhna a awm chho zel.
- Buddhist Puithiam thenkhatte rinchhan lutuka thiltih leh an thusawi awmze nei lo ring a, a chetnaah hlawhtlinna a awm lo
- Sipaite thuneihna, kham tawh mipuite beih letna chu tun hma zawng aia nasain a hmachhawn chho zel
- Sipaia tang duh an awm tawh lova, military recruitment kalpui theih a ni tawh lo
- Sipai chu ram leh mipuite venghimtu anga hmu tawh lovin, mipui harsatna siamtu leh rapbettu anga hmuhna lo awm te leh
- Sipaiin a tih tur dante bawhchhiain, mipui chunga rawng taka a thil tih te (Entir nan, tharumthawh lova kawng zawhte sniper hmanga an lu kahsak ang chi te …) bul tumtu ber chu Min Aung Hlaia thupek a nih tlat avangin hming chhiatna bakah thisen chhuahnaah mawhphur rip tak a lak a ngai tih sipai tam tak pawhin an hmu thiam vek a ni.
Chuvangin, sipai thenkhat chu an kalphung a dik tawh lo tih hriain mipui lamah an rawn ding zel a, CDM zawm sipai ringawt pawh 1500 an chuang tawh a. Ram chhung hmun hrang hranga awm sipaite pawhin tlan chhuah dan kawng an dap mek a. Sipai chhungkua chu a kehchhe tan tawh a ni.
Hetianga sipai hming chhiatna, politics buaina leh ram chhung buaina zawng zawng ching fel tur chuan sipai chhungkuaah inthlak thlengna a awm ngei ngei a ngai a. Pawn lam mi (mipuiin) an rawn tlawm (lehthal) hma ngeia sipai chhungkuaa an insiamrem a ngai a, an buaipui tan tawh tih pawh hriat a ni. Kawng lehlamah mipui sipai lam lah a ni telin an lian tual tual a, khawvel ram hrang hrang thlawpna an hmu tha tulh tulh bawk a ni.
Chuvangin, General Soe Win leh Min Aung Hlaia thuneihna chu sipai General dangin an chhuh let dawn nge, a nih loh leh, Min Aung Hlaia thuneihna hi Gen. Soe Win-an a laksak dawn tih chu kan thlir mek a hun tawh a. A tu ber leh eng pawl berin nge thuneihna rawn chhuh let dawn tih chu la hriat theih loh mah se, thuneihna inchhuh letna chu a thleng ngei dawn tih a chiang thaw khat tawh a.
Sipai chhungkuaah General Than Shwe-a autute an awm tih thu hriat chu Min Aung Hlaia tan chuan ngaihthlak a nuam lo viau ang le. Engpawhnise, mipui, PDF, NUG leh EAO ten an thil tum hlen chhuak turin hnung tawlh lova an kal zel a ngai a.
Sipai chhungkhuaah thuneina inchhuh letna a thlen hunah chuan 2020 inthlan result chu pawm a ni ang a, pawi khawihna zawng zawng chu Min Aung Hlaia chungah burbun a ni bawk ang a, mipui thlan sorkar NLD chu thuneihna pek a ni leh ang, tih chu thil thleng thei vek a ni a. Mahse, chu chuan inthlak danglam tak tak a thlen dawn lo. Chu mi piah lamah sipai dinhmun zel tur tichiang a, politics rorelnaah inrawlh lova, mipui thuneihna hnuaia awm hlen thei tura Dan pui siam that leh Federal state din bakah thil dang tih tur tam tak a la awm a.
Chutianga sipai hotu luten President kaihhruai mipui sorkarah rinawmna an tiam thei a nih chuan Myanmarah silai hmet puak tawh lova hneh theihna Win Win situation a thleng dawn a. Mahse, Min Aung Hlai erawh ram phatsanna leh pawisawi lo mipui thahna avangin hrem a tawk ngei ang. Chu hun chu a rei tawh dawn lo tih chu amah ngei pawhin a hre tawh a ni.
- Right Ananda
