Pago region, Pyi district, Paungti khuaah firfiak sipaiten pafa pahnih chu Mytel tower tihchhiat tum chungchangah manin an dawp a. Chu an dawpna hmunah chuan a fapa zawk chu vuain, an nghaisa nasa hle a, a fapa tuar nasa lutuk chu hmuh hrehawm ti leh tuar zo lovin, a pa zawk a intihhlum thu, an chhungten Khit Thit media an hrilh.
Puangti khuaa U Too Gyi leh a fapa Maung Thi Ha te chu September ni 13 khan firfiak sipaiten Mytel tower bomb chhiat tuma puhin an man a. Sipai camp lam an panpuina kawng tluanin kut thlakin an sawisa nasa dun hle a. Sipai indawpna hmun an thlen chuan a fapa zawk chu in chung lamah an dawp a, in hnuaiah a pa chu an dawp bawk a.
A fapa zawk sipaiten zan khuaa ngaihsa a, an vuak thawm chu a pa chuan a hre vek a, anni pawh an sawisa nasa hle tho a ni. September ni 14, chhunah a pa zawk U Too Gyi chu sipaiten an chhuah a, mahse a fapa chu chhuah ve lovin, an sawisa chhunzawm zel a. Chutianga a pa zawk in lam a thlen hnu chuan a fapa an nghaisak lai thawmte chu a bengah a la cham reng a, a rilru pawh a pangngai zan loh phah deuh niin a chhungten an sawi a.
A pafa chu chhuah turin a phun chungin a sawi deuh reng a, ani pawh chu min la rawn man leh dawn tiin a sawi a. An in tukverh atang chuan a fapa lo haw tur chu a thlir reng a, chutih rualin sipaiten amah an man leh tur thu pawh a sawi deuh reng bawk a.
September ni 19, khan a fapa ngaihtuaha lungkham leh rilru buaia awm U Too Gyi chu veng chhung puithiam school hnung lamah thil zum tak hmangin a hrawk a zai a, a intihlum ta tih hriat a ni.
Chu thil zum hmanga a inzai hlum hmain, U Too Gyi chuan in awhhlum a lo tum tawh a, mahse a inawhhlum tumna hrui a chat a, thing kung zara a hrui khai chat tawh atangin a hriat theih a. A tawpah thil zum tak hmangin a intihlum ta niin, mita hmututen an sawi a.
U Too Gyi -a ruang chu September ni 19 tlai lam dar 3 khan vui liam a ni a, sipai indawpna hmuna nghaisak tawk mek a fapa chuan a pa thih thu pawh a la hre thei lo niin, an chhungten an sawi bawk a ni.
