September ni 18, tlai lam dar 3:30 vel atang khan Military Council ten ralthuam lian hmangin Chin State, Thantlang Township an bei chiam a, chenna in 19 zet an hal chhiaksak bakah Pastor pakhat an kap hlum a. Hemi chungchanga Thantlang Township, thalai hruaitu pakhat, Khonunthung Media-in a zawtna hi a lo ngaithla ila.
Zawhna: September ni 18 tlai lam Thantlang Township-a chenna in kang chungchangah eng tia boruak intan nge a nih le?
Chhanna: A hma ni khan boruak neuh neuh chu a awm tan a. CNA/CDF infin khawmin chetna an nei ve nual a, zing dar 10:00 atanga tlai lam dar 4:00 thleng khan khawpui chhungah an inkap char char a. Hetia an inkahnaah hian Sipai lam mi 30 chuang an thi niin kan hria a. CNA/CDF lam erawh chu thi leh hliam an awm lova, an insaseng hlawm a.
Chumi hnuah Military Council ten an rinhleh Building leh chenna in thenkhat chu ralthuam lian hmangin an tawngpawng kah chiam a. Chenna in, mipui bitna hmun ber No. 1, Ward an tih, tun hmaa School Veng an tihna hmun kha a ni.
Zawhna: Chenna in hi eng zat nge a kan a, thi leh hliam an awm em?
Chhanna: Chenna in 19 zet a kang a, nu pakhat chu a hliam niin kan hria a, a dinhmun kan hre zui tawh lo. A kan vanglai hian an la inkah reng avangin tumah pawn chhuak ngam kan awm lo a ni ber mai.
Zawhna: A kan lai khan kang thlelh Motor te a rawn thleng ve em?
Chhanna: CDM-a an luh deuh vek avangin hriattir mai tur, tumah an awm lova, CDM-a lut lo pakhat chu a awm ve nain a chhungte a buaipui ve bawk nen, kan en liam ve tawp a ni ber mai.
Zawhna: Kang thlelh tura kal, Pastor pakhat Sipaiin an kap hlum tih, kan lo hria a, a boruak tawn dan min hrilh thei ang em?
Chhanna: A kan vanglai khan tumahin pawn kan chhuak ngam si lova. Chumi karah Khawchhunga kan rinchhan leh thalai hruaitu ni bawk Thantlang Centenary Baptist Church (TCBC) Pastor Cung Biak Hum chuan, mi sawm khawmin an kal ta kha a ni a. Thantlang kawngpengthuam an thlenin hmaichhanah Military Council ten an kap a, a boral nghal. Chumi hnuah a kuttang tansak nghalin an inneih zungbun an laksak a, mipui ten kan lainatin, kan thin a rim tak zet a ni.
Zawhna: Tun dinhmunah engtin nge in awm a, a hnu leh zelah engtin nge in awm tak zel ang le?
Chhanna: Vawiina kan thil tawn chu Military Council te hian ramsa zia ang takin rawva takin an che a, a zat chiah hre lo mah ila, Thantlang mipui thahnem fe chu khaw pawnah an raltlan nual tih hriat a ni.
Zawhna: Raltlante hi mi eng zat vel nge an nih i rin?
Chhanna: Tunah rih chuan mi 5000 chuang atanga mi 6000 vel an ni ang. Khawpui hnaivai, tlang karah an insaseng mek a, Nimin kan dinhmun en chuan khawchhung atanga tlanchhuak tur pawhin a harsa hle a, Flag var kenga tlan te leh ke lawnga tlan lawp lawp te pawh an awm nual.
# Raltlante hi ei leh in, hmanrua keng mumal lo an nih hlawm avangin an dinhmun a harsa hle a, tlawmngai pawl ten a theih ang anga an chhawmdawl thil an la ei in mek tih hriat a ni a. Thantlang khua chu khaw mi tam zawkin an chhuahsan tawh a, nimin lam chuan khaw chhung mi zaa 99% chu an tlan chhuak vek tawh tih hriat a ni a. A tam zawk chu Mizoram lamah an tlan lut mek a. Chutih rualin tar chak lo leh damlote tana insawn chhuah chu a namai lo hle a, an lainat awm tak zet a ni.
