Myanmar ramah sipaiin thuneihna an lak, February ni 1, 2021 atanga kumin May ni 31 thlengin sipai thuneihna dodal vanga man tawk mi 1215 an awm tawh a, hremna na ber thi tur leh dam chhung tang tura an chung thu relsakte chu 209 an awm tawh bawk thu ISP Myanmar pawl thuchhuah atanga hriat a ni.
Jail tang tura tih mi 1215 zingah, man tawka thi tura an chung thu rel tawh leh arrest warrant chhuaha thi tura relte chu mi 117 an awm a, man tawk tawh thi tur leh dam chhung lung in tang tur chu mi 6 awmin, man tawk tawh dam chhung lung in tang tur ringawt chu mi 86 an awm tawh bawk a.
A bak mi 1006 te chu man tawh leh man tura tihte an ni a. Chung tihhlum tur leh dam chhung tang tura an chung thu rel kawp tawk mi 209 zinga mi 202 chu Yangon region awm niin, mi dang 7 chu Ayawaddy region lama awm an ni.
Man tawka tihhlum tura an chung thu rel zingah kum 18 la tling lo mipa 2 an awm thu hriat a ni a. Yangon North Okalapa township-ah tihhlum tura rel mi 52 awmin dam chhung lung in tang tur mi 12 an awm a. Hlai township-ah pawh tihhlum tur mi 17 leh dam chhung tang tur mi 30 an awm bawk a.
88 generation zirlai hruaitu U Jimmy, Ex. MP U Phyu Zyi Ya Taw leh U Aung Tu Yah Zaw te 4 chu tihhlum tura an chungthu rel fel a nih tawh thu military council information deputy Minister-in a puang zar tawh a ni.
Chutih laiin UN secretary general leh Myanmar-a France Embassy mai bakah US Foreign Affairs Ministy department-a thupuangtu ngei pawhin Military council thutlukna siam chu an pawm loh thu, an dem thu leh chhuah zalen nghal tura an ngen thu an sawi chhuak a.
Mahse, military council hnuaia foreign affair ministry department chuan international demna leh ngenna chu ngaithla lovin a hnawl fithla vek a ni.
