Sagaing region, YinMaPin township north east (Chhuah hmar) zara SoneChaung khua chu July 21 zing dar 2 vel atang khan Military council sipai 100 rualten an luhchilh avangin kum 18 tleirawl telin tualchhung mi 8, PDF sipai mi 6; an vain mi 14, Military council sipaiten an thah thu tualchhung miten an sawi a.
Heng an thah te hi an man hnuah rawng takin an that a, an ruang te hmuh a nih thu SoneChuang khuaa thuneitu pakhat chuan RFA Media a hrilh a ni.
Heng an ruang te hi SoneChaung khuaa mipuiten July 21 khan an khaw hmar lam KyuakHmaw khuaah an vui liam thu hriat a ni a.
Military council sipaiten ralthuam liana an bomb reng thin avangin tualchhung mi te an tlanchhe nual a, tlanchhe ve lo te an man zingah mi 30 chuang te chu July 21 khan an chhuah leh thuai a.
Mipui tlanchhia te hian khawchhunga mi an thah chiam avangin an la hawm ngam rih lova. SoneChuang khuaah hian chhim leh hmar, tlak lam leh hmun laili khua tiin khaw 4 an awm a, In 2000 chuang leh mihring 7000 chuang an awm a, leilet hmanga ei zawng te an ni hlawm a.
Political prison (AAPP)-ten July 21-a an thuchhuah danin Military council-ten thuneihna an lak hnu atang khan ram chhungah mi 3819 an boral tawh thu an tar lang a ni.
SoneChaung khuaah insuatna rapthlak tak an tawhna chungchangah Military council-ten vawiin thlengin eng thu mah an tar lang lova. Hemi chungchangah RFA media-ten Military council thupuangtu General Zaw Min Tun, phone hmanga an zawhnaah chhanna a la awm rih lo a ni.
