Military council sipai, BGF te leh KNLA te hman ni lawka a inkahna avangin Myawadi township, Swe Kok Ku khua tualchhung mi te Thai-Myanmar ramri-ah an tlanchhe nual a. Heng raltlante hi Thai sorkar ten April 9 atang khan Myanmar lamah an thawn kir leh nual thu hriat a ni.
April 6-a inkahna avangin Thai lamah a sang tel an tlanchhe hlawm a. Tunhnai lawk atang khan boruak a ziaawm deuh avangin Thai sorkar chuan mi a sang tel Myanmar lamah an thawn kir leh a. April 9 khan huphurh deuhin an kir leh tiin raltlan tanpuitu zinga secretary lian Ko Aung Min Soe chuan a sawi.
“April 9 khan mi 2000 chuang kan thawn kir a, an huphurh khawp mai. A thlen zanah Thlawhna a thlawk kual leh a, an bei hran lova, an ngaih a tha lo hle a ni”
Haw kir leh duh lo te tan hmun 2-ah an awmna tur kan buatsaih tiin a sawi zui bawk.
“An awm lawkna tur hmun 2 kan buatsaih a, mi dang chu kan thawn kir tawh. Wanpha SMRU Clinic bulah khan awmna hmun 2 buatsaih a ni a, mi 2500 chuang kan dah a. Hun rei tak awm theih ang tur hmun hma leh tui thianghlim khawl thlengin bunsak an ni. Tuna la chambang te an kir duh lohna chhan chu inkah a la reh loh vang a ni” tiin a sawi zui bawk a ni.
Raltlan te hian ei in leh ek in chungchangah harsatna an nei lian hle avangin kir leh an duh hlawm a ni. Heng karah hian April 10 khan Myawadi khua No. 5 Ward bul, Mea Sot (Me Sauh)- Myawadi Lei No.2 kawngah bomb a phuah angin Ward 6- pawh a puak leh a; heng a vang hian Myawadi khua leh a chhehvel a la him tawk lo hle a ni.
Myanmar mipuite tan a tawngtaisak fo thin a ni.
