Bago (Pa Gu) region, Swekyin township inkahna avangin Military council sipai ten ralthuam liana an bomb avangin khaw 10 chuanga tualchhung mipui singkhat (10000) in leh lo an tlansan thu tualchhung mi ten an sawi a.
He an thil tawn atang hian inkahna a sosan zel an rin thu Swekyin township-a PDF thuneitu pakhat chuan a sawi a. Raltlante ei in leh an mamawh chi hrang hrang pekna kawng an khar chu tualchhunga hming thup pakhat chuan RFA Media-ah heti hian a hrilh.
“Ei in leh pawimawh chi hrang hrang inpekna a harsa hle a. Kawng an khar vek a, damdawi pawh lak luh an theih tawh lo. Engkim min dan vek avangin mutbu leh silhfen thlengin kan harsa khawp mai” tiin a sawi a.
Military council ten thuneihna an lak hnu, kum 2022 December 31 thleng khan KNU huam chhungah vawi 7587 an inkah tawh thu KNU Centre ten April 5 khan thu an chhuah a. Thla khat chhungin vawi 500 chuang an inkap thin a, kum 2023 February thla chhung khan vawi 854 an inkah tawh thu KNU-a thuneitu pakhat chuan a sawi.
KNU huam chhung Swekyin township leh a chhehvelah inkahna a chhuah mai theih thu Swekyin township-a PDF thuneitu pakhat chuan RFA Media a hrilh a.
“Inkahna boruak a thleng nasa mai thei. A chang leh an hnungtawlh a, hma an nawr leh a, Drone hmangin an inkap ve ve tawh a; boruak a la nasa mai thei, tualchhung mi te pawh an tlanchhuak vek tihtheih a ni” tiin a sawi.
Military council thupuangtu General Zaw Min Tun hnenah Military council sipai ten mipui chungah kut an thlak dawn nge dawn lo RFA Media-in a zawhnaah chhanna a awm rih lo a ni.
UN mipui chhawmdawl pawl (UNOCHA) ten April 5 thlenga an chhinchhiah dan chuan Myanmar-a ralthuam an chelek nasat avangin tualchhung mipui maktaduai 1.8 chuang an tlin tawh thu an tarlang a ni.
