Nimin 17 March 2021 khan sipai sorkarna duh loh avanga Tahan atanga mipui kawngzawhte chuan Myohla lamah an phei a, chu chu sipai lam chuan um zuiin hnawh darh an tum a, silai an hmet puak chiam a. Tahan lam an rawn let leh hnuah mi 4 , Cung Lian Ceu, Cing Kham Mang, Do Sun Kim, U Kyaw Myint Win te an kap hlum.
Kum 25 mi Cung Lian Ceu hi Pu Tlang Lian Kham leh Pi Van Siang Nei Par fapa upa ber a ni a. Cung Lian Ceu hian kawngzawhnaa, a nau hruai haw tura kal chu . Taungphila , TaungZaLat Veng, Ngyi Ngyi Tun thingpui dawr bulah sipaiin an kap hlum ta a ni. Vawiin 18 March 2021 zing lam dar 10:00 khan Chichai thlanmualah mipui thahnem tawk takin an vui liam a ni.
A hnu lawkah Tahan ramri thlang lawk Sanmyo Ward, KanBawZah Bank (2) leh BarRaNey Beauty Parlour inkarah kum 27 mi Cing Kham Mang chu a Bike chuang lai kah hlum bawk a ni a, vawiin tlai lam 2:00 khan Chin State, Khamkang thlamualah vui liam a ni.
Tahan AG Biak in kawt, kawngpuia an kah hlum tak, Chin State, Tedim, Theizang khawchhuak kum 19 mi, Do Sun Kim chu Kalaymyo sipai hmunpui atanga la chhuakin vawiin tlai lam khan a pianna khauah phurh haw mek a ni a, naktuk hian vui liam a ni ang. Tahan AG Biak in kawt veka an kah hlum ve tho, TaungPhiLar Venga kum 42 mi, U Kyaw Myint Win (NgyiLy)-a ruang pawh chu la chhuak lehin naktuk hian Kalaymyo (Varpui) thlanmual intawmah vui liam tur a ni bawk.
Mi man an nei nual a, TaungPhiLa kawng kam sa zuar pawh an zuah lova, mi thenkhat a zan la laa an chhuah rualin chin hriat loh an awm nual bawk.
Tukin khan kawngzawh leh niin tluang taka zawh fel a ni a. Sipai lamin kawngpui (Bogyoke stereet) zawh chho lehin hmun hnihah an inkhuar a, chawhnu lamah an reh leh ta a ni. Vawiin thleng hian Tahan, Sanmyo leh Taungphila , Hmunlai veng chheh vel chu zing lam atangin dawr leh in thenkhat khar a ni nual a, kawnga veivak an reh hle.
