Sagaing region, Kalaymyo-ah tualchhung miten electric bill pe ngei ngei turin military council sipai leh police-te chu in tinah lut chhuakin in neitute an hrilh a. Hun tiam chhunga an pek loh chuan tihtawpsak an nih tur thu hrilhin an vau zui tih hriat a ni.
Chin hnam hrang hrang awm tamna ber Kalaymyo tlang lam Tahan vengah ni 3 vel liam ta atangin military council pawl chu RPG telin, ralthuam chi hrang hrang kengin veng chhung mite inah lut chhuakin electric bill pe tura an hrilh thu tualchhung miten an sawi a.
Tahan veng chhung mi pakhat chuan, “Tahan venga an rawn kalna hi tum thum vel a ni tawh a. Ralthuam hrang hrang an keng kim hle a, RPG te pawh an rawn pu a, Meter box awmna inah an lut zel a, inneitute chu electric department office-a bill pe turin an hrilh a. In thenkhat chu bill an pe lo a nih chuan current tihtawpsakah an vau zui bawk a ni,” tiin a sawi
Military council pawlin chutianga ralthuam chi kimg keng chunga civil mite chenna ina an lut chhuak chu veng chhung mipuite a tiralti hle a. Tahan tualchhung mi nu pakhat chuan, “Kan ina an rawn kal tumin bill lehkha 6 min pe a, hun tiam chhunga electric department office-a bill I rawn pe lo a nih chuan kan tihtawpsak dawn che tiin min hrilh a, engtia tih tur nge kan hre lo, min tihtawpsak tak tak ang tih kan hlau bawk si a,” tiin a sawi.
Kalaymyo-a electric (eng) regular taka a awm lohna chu a thla tel a ni tawh a, tlai lam dar 3 velah chiah current a awm thin a, zan lamah pawh darker 3 bak a awm ngai lo tih hriat a ni a.
Kalaymyo-ah current awm dan chu ni khata darkar 24 awmah darkar 7 vel chiah eng hmuh theih a nih thu Tahan veng chhung miten an sawi a ni.
