Taingen Khua Atanga Chin Mipui Venghimtu Pawlte an Tawlh Sawn Chhan

0

Chin state Tedim township Kalay-Tedim kawngpui pawimawh lai, Taingen khuaa inkahnaah ralthuam leh sipai inthlauh em avangin, Chinland Defense Froce te an tawlhsawn tih hriat a ni.

Military council sipaiten January ni 22 zing lam dar 7 vel atangin Kalaymyo University campus atangin laipui kap hla thi chi 60 mm, 120 mm leh 155 mm hmangin Khiangzing khaw bul chu vawi 20 chuang an kap a, helicopter pahnih atang pawha an rawn beih thu PDF-Zoland thupuangin heti hian a sawi a ni.

“Zing lam dar 7:30 vel atangin Kalamyo University campus atangin laipui chi thum hmangin an rawn kap a, vawi 20 vel a ni ang. Zing lam dar 8:30 velah helicopter pahnihin kan awmna hmun nia an rin chu hel kualin an kap bawk a ni.”

Indo-Myanmar border trade kawng pawimawh tak pakhat Kalay-Tedim kawngpuiah January ni 12 atangin, Kalaymyo atanga Chin hill lama chho force 100 chuang telna military council sipai kal chu Thrizan, Khiangzing leh Taingen khaw inkarah January ni 13 atangin Chin mipui venghimtu tangrual pawlin lo kapin, an inkap tawn zui a.

Force 100 vela rin, military council sipaiho chu Khiangzing khaw bul Taingen khaw hnuai lamah hma lam pan thei lovin, an tangkang reng a, Taingen lama an kal chhoh theih nan, laipui leh van lam boruak lam atangin sipai dangin an rawn pui ta a ni.

Chu mi hnuah military council sipai tam tak chu Taingen lamah chhovin, operation an nei chhunzawm nghal a, ni 22 zing lam dar 8 hnu lam atanga tlai lam dar 5 thleng inkahna nasa tak a chhuak zui a.

Taingen lama operation nei military council sipaitete tanpui turin Tedim township lam atangin Zomi Revolutionary Army (ZRA) leh sipai lam force 100 vel chu Tedim-Kalay kawng atanga an kal bawk avangin, Chin mipui venghimtu pawl chuan bei chhunzawm zel turin an in tam hlei tih kan hre ta a.

Chuvangin, January ni 22, tlai lam dar 5 velah mirhing leh ralthuam lama an inthlauh em avangin, Chin mipui venghimtu pawlten Taingen khua chu an chhuahsan ta tih hriat a ni.

Chu inkahnaah military council sipai lamah mi 40 vel a tlem berah an thi a, Chin mipui venghimtu pawl lamah Chin National Army (CNA) sipai Salai Chungliansang leh PDF-Zoland-a MungNo te chu bomb puaka an thi thu hriat a ni.

Share.

Leave A Reply

Exit mobile version