Chin State, Tedim township, Taingen khuaa Military council sipai camp chu CDF CDM SIYIN Battalion-ten hnawksak an tih avangin June 30 khan thuchhuah an siam hnuah July 1 atang khan Kalaymyo atangin Military council sipaiten an thiante puibawm turin Military council sipai 60 vel an thawn chhoh thu hriat a ni a.
Tualchhung mi pakhat chuan “July 2, chawhnu dar 4 vel khan Kalaymyo University atangin Military council sipaite motor 3-in Chin Hill-ah an chho va, tunah rih chuan Taingen khua an thleng tawh” tiin a sawi a. Kalaymyo atangin Taingen khua hi Motor-in darkar 3 vel an thang thin thu hriat a ni.
July 30-a CDF CDM SIYIN-ten an thuchhuah dan chuan Siyin ram huam chhunga, Military council camp-a sipaiten, PDF te tiin pawi sawi lo mipuite an man leh an sawisak chungchangah an lung ni lo thin hle a, kuangkuah chunga thlir mai mai a harsat thu an tar lang a ni. Tun hnai khan Taingen khuaa Military council sipai camp-a mipui veivak reng reng te chu Revolution beitute tiin an man thin thu hriat a ni.
