Sagaing region, Tamu township, Yan-Lin-Phai khuaa inkulh firfiak sipai, Pyuisawhthi pawl leh mipui venghimtu pawl Tamu battalion 3 te inkarah June ni 8 atangin inkahna a chhuak ni leng thak a, sipai lamah thi tam tak an awm theih thu leh Tamu PDF lamah 1 thiin, 3 an hliam thu hriat a ni.
Tamu PDF battalion 3-a awm pakhat chuan, “Hmuntha khua chu sipai uicho leh Pyui ho, force 150 velin an awm chilh a. Chu mi hmun atangin Khawhmun khua an lut a. Biak inah an inkulh zui a. Chu mi hnuah Yan-Lin-Phai chu laipuiin vawi 20 vel an kap a, a hnuah Yan-Lin-Phai khuaah biak inah an inkulh leh bawk a. Khaw dai femah June ni 8 chawhma lam dar 10 vel atangin kan inkap tana. Laipui chu vawi 100 chuan an kap puak a. Sipai uicho ho chu an thi nual ang, dar 7 velah khaw chhungah an tlan lut leh a. Keini lamah 1 a thi a, 3 an hliam,” tiin a sawi.
June ni 7-ah pawh Khawhmun leh Yan-Lin-Phai khaw inkarah sipai motor 10 vel chu Tamu PDF battlion 3, 2 leh Special Task Force (AB) ten an bei a, sipai an thih nual thu hriat a ni.
Tamu khua, Saw-Buaa veng no. 4-a awm chenna in pahnih chu laipuiin a deng chhia a. Tualchhung mi pakhat chuan, “Sipai laipui kah puahin a deng chhia a. A rawn kah chhan chu PDF te an hneh loh avangin, khaw chhung lam hawiin an rawn kap ringawt a ni. Hlawkna engmah a awm lo. In chauh a chhe zawk a, mihring a fuh lo hlauh a. In pakhat zawk chu a hnung lamah a fuh a ni,” tiin a sawi.
