Indo-Myanmar, Sagaing Region, Tamu township, Zi Tann 9 Venga awm, tualchhung nu pakhat chu July 19 tuk khan Military Council ten an man thu tualchhung mi ten an sawi.
Nimin tuk zing dar 9:30 khan, Tamu township, Zi Tann 9 Vengah PDF member Moe Moe Aung (Mu Mu Awng) chu kawngzawh kawra lehkha inziak awm nen man a nih thu Military Council ten an thuchhuahah an tar lang.
Moe Moe an man chungchangah tualchhung mi pakhat chuan “ Tamu khawpuiah ni tin a hluar zel a, PDF te leh Military Council te Khawpui chhungah an inep nasa hle. Phyusawhti pawl te an nghal tan a, Dalan (Kawktu) te hekna avangin an man nual a, Tamu Myoma (Miauh Mah) Police Station-ah an hruai zel” tiin a sawi.
July 13 leh 14 pawh khan Tamu khawpuiah tualchhung mipa 2, Military Council kut hnuaia Phyusawhti pawl ten an that.
Tunlai tak hian Tamu khawpui chheh velah Vengchhung PDF te leh Military Council te an inep nasa hle a. Tamu khawpui chhungah, Military Council te kut hnuaia Phyusawhti pawl ten mipui an vau a, an thah thin avangin tualchhung mipui te an hlauhthawn thu Tamu khawpuia tualchhung mi pakhat chuan a sawi.
