Chin State, Tawnzang khuaa August 2 tuka inbeihnaah tualchhung mi pakhat a boral a, nutling pakhat leh naupang pakhat an hliam thu hriat a ni a.
August 2, zing dar 4 vel khan CDF tangrual te leh Military council sipai te an inkah thu hriat a ni a. An inkah hnu rei lo teah police outpost hnaia awm nupa te chu Bike-a chhuakin police outpost atangin an kap a, Mualpi khuaa awm kum 27 mi Pu Kan Sian Cing chu kap fuhin a boral nghal a, Bike-a a phurh, a nupui pumah an kah hliam avangin damdawi inah an enkawl thu hriat a ni a.
“An inkap tawh lo nia ngaiin Bike-in an tlanchhuak a, police outpost atangin an kap a, pa ber an kah fuh avangin a thi nghal a, a phurh mi a nupui pumah an kah hliam avangin damdawi inah an phur lut a, a na zual khawp mai” tiin tualchhung mi te leh a hnaivaia miten an sawi a.
He inbeihnaa ralthuam lian an hman avangin kum 8 mi leh kum 12 mi naupang an hliam thu hriat a ni bawk.
August 2 tuk, Tawnzang khuaa inbeihnaah hian CDF-Hualngoram sipai kum 30 mi Lalramchuana chuan ram tan a nunna a hlan a, mi 3 an hliam a. Military council sipaite thi leh hliam an awm nual nia hriat ni mah se, a zat chiah hriat a nih loh thu tualchhung news atanga hriat a ni bawk.
