Taninthari (Ta Nin Ta Ri) region, Tayetchaung township Ngyaung Zin khuaah May 10 khan Military council sipaiten pawi sawi lo mipui 50 chuang an man bakah innei tur mo neitu a inbuatsaih lai an kah hlum thu hriat a ni a.
Military council sipaiten mo neitu tur Ko Tin Shiang chu Tayetchaung township Yan Taung khua atangin Dawei khuaa an hruai hnu, a ni khat hnu May 11 chawhnu dar 5:00 vel khan an kah hlum thu hriat a ni a.
Mo nei tur mo neitu hi an phone-ah revolution kaihhnawih thlalak a awm nual tia puhin Military council sipaiten an man a. An dawp hnuah a chhung te hnenah Kyats nuai 50 an phut a, Ina an hruai haw hnu an kawtah an kah hlum thu hriat a ni bawk.
Mo nei tur Ko Tin Shaing hi an inneih hma a nupui tur nen thla an lak laiin Military council sipaiten an man thu Tayetchaung khuaa tualchhung mi pakhat chuan a sawi a.
Hemi hnu hian Military council sipaiten May 10 tuk Dawei khua atanga rawn chhuak Private Car 2-in Ngyaung Zin khuaa tualchhung mi pawi sawi lo 50 vel an man thu tualchhung miten an sawi a.
Heng mipui 50 vel an man te hi social Media thenkhatah an chhuak vek tawh tiin an tar lang nual a, man tawk chhung te leh tualchhung mipuite an zawhnaah an la chhuah rih loh thu an sawi ve thung a ni.
Military council sipaiten tualchhung mipui 50 vel an man hnu hian an chenna inahte luh chilhin rangkachak, pawisa leh phone bakah thil man to tak takte an laksak nual thu tualchhung miten an sawi a, chiang taka hriat a ni lo.
Hetiang vek hian thla kal ta April thla pawh khan Military council sipaiten Ngyaung Zin khuaah inkah buaina awm lovin an luh chilh ringawt a, pawi sawi lo tualchhung mipui 100 vel manin an sawisak nual thu hriat a ni bawk.
