Chin State, Tedim khawpui, Civil Hospital-ah kum 6 mi tiamin Covid-19, natna mi 3, enkawl mek an ni a, an dinhmun a hlauhawm loh thu Damdawi Ina thuneitu pakhat hnen atanga hriat a ni.
Tedim khawpuiah hian September 20, tuk thleng khan Covid-19 hri kai thar, hmeichhia 8 hmuh an ni a. September 19, khan Covid-19 hri kai, enkawl dam mi 5, Damdawi in atangin an chhuak tawh.
“Anni hi Damdawi inah ni 7 chhung enkawl tawh a nih hnuin in dam tawh e tiin an chhuahtir. Eng ang Covid-19 hri nge tih pawh hriat hran a ni lo. Tedim khawpuiah Covid-19 hrik enna khawl kimchang a awm loh vang a ni” tiin Damdawi Ina hnathawktu pakhat chuan a sawi.
Covid-19 hri kai thar te hi tualchhung mi te an ni a, enkawl dam tawh te hi Covid-19, Vaccine chiu tawh te niin khawsik san vanga influrenza natna an hmuh thu hriat a ni.
Tun dinhmunah hian Tedim Civil Hospital-ah Covid-19 hri, kai leh kai lo, a thlawnin an ensak mek tih thu hriat a ni.
“In entir te zinga positive hmuh an nih chuan Damdawi Inah an awm nghal ang, an tih avangin an hlau hle a. Damdawi Ina, a hranpaa enkawl mek te tan, ei leh inah mipui ten theih tawp an chhuah an ngai” tih thu Damdawi ina hnathawktu pakhat chuan a sawi.
Tedim khawpuiah hian Covid-19, Vaccine chiu thin zel a ni a, tun dinhmunah an chatlak thu hriat a ni.
Covid-19 hri, a darh leh tak avangin mipui ten Mask vuah turin emaw, kut sil fai emaw mipui kara awm tam lo turin leh Covid-19, dan hmasa anga zawm hram turin a sawi zui bawk.
Hetiang vek hian Chin State, Falam khawpuiah pawh Covid-19 hri kai thar mi 5, hmuh an nih thu hriat a ni a. Chin mi te awm bitna Sagaing Region, Kalaymyo-ah pawh Covid-19 hri kai thar an awm thu hriat a ni.
Covid-19 hri kai thar, Zaa 80 te hi Vaccine chiu lo te an ni a, Zaa15.9 hi Vaccine Dose 1 chiu te an ni a. Zaa 4 hi Does kim chiu te niin Zaa 0.1 hi Does chiu nawn fo te an nih thu Military Council, Health of Ministry ten an thuchhuahah an tar lang.
