Chin State, Tedim khawpui, Sakaw kawngah October 3, zan dar 9:00 vel khan Bomb puah avangin nupa a fuh a, an pa zawk a boral nghal a, a nupui, hliam na tak a tawrh thu hriat a ni.
“Zanah an kawtah Bomb a puak a, pa ber a boral nghal a, nu ber erawh hlauhthawnawm khawpin a hliam bawk. 269 Battalion hnuaia, Battalion te nen an lenvah rei lo teah heti hian a thleng nghal a. A puahna hmun hi kawngpui kam, Battalion-te awmna chung lawk a ni a. Anni hi Burmese an ni a, he laia an awmna hi a rei tawh khawp mai, ka naupan lai pawhin ka hmu thin” tiin Tedim khawpuia tualchhung mi pakhat chuan a sawi.
He Bomb puahna hmun hi Tedim khawpui, Sakaw kawng, Military Council Battalion 269 hnuai, Pi San Choe (San Chhu)-i chaw dawr kawtah a ni a. He Bomb hi Military Council sipai ten an kam, a ni thei tiin tualchhung mi ten an rin thu an sawi.
Bomb puak vanga boral ta, pa ber hi kum 50 mi niin hliam na tak tuar mek a nupui hi Kalaymyo, Civil Hospital khum 100 awmnaah an enkawl mek thu hriat a ni.
October 1 pawh khan Halkha township, Halkhathar Ward-a awm, kum 30 mi Pu Biak Cung pawh ramhnuaia a chawhmeh zawnnaah Bomb kam a rah puah avangin a ke vei lam, tansak a ni tawh bawk.
Chin Human Right pawl te chhinchhiah dan chuan Military Council ten sorkarna an lak hnu hian Chin State-ah Bomb kam rah puah avangin tualchhung mi 10 aia tlem lo an hliam tawh thu hriat a ni.
